uMthunywa
Silo Ophezulu Stinta
SIQHUBEKA lalo iqilindini elinguMaMsie elaselizenza umuntu ebantwini yena vele elezakhe inhloso ezingasese.
Ngumuntu olesiphiwo sokuvala umuntu emehlweni amkhohlise kalula nje. Ngensuku omalumakhe belapha ekhaya wayedidizela esebenza gadalala ezenza umuntu. Kwakunzima ngale ngekamelweni labo ngoba uNgonyama wayevele engamniki mlomo.
Ingulube vele ayiwatshiyi amanyala ayo loba ungaze uyigeze njani iyabuyela nje iyezibhukutshela edakeni, esekamelweni lapha uMaMsie wayehlala njalo nje ezikhumbulela uJoza, engethuki lalapho aphume khona loJoza wakhe lowo. Wayezimisele uMaMsie ukuthi wayengasoze avumele uNgonyama aqume umtshado wabo. Zaqhubeka insuku uMaMsie eqina amanxeba ephola emzimbeni lapha, loba nje wayehlala ebika lokhu lalokhuya okwakungelaqiniso ukuthi kwakuvele kumkhathaza na. KuMaMsie sifunda ukuthi empilweni kuhle umuntu afunde ukuzimisela, njalo amele into ayifunayo. Wayengathikazi ngokulwela umtshado wakhe, wayeqine saka ngelithi kasoze avumele uNgonyama eqamula umtshado wabo.
Into ebuhlungu lapha okungaphezu kwakho konke okuyisifundo esimqoka empilweni yikuthi abantu okuyibo esibathandayo yibo njalo abasizwisa ubuhlungu. UMaMsie uphandliwe emehlweni lapha. Kaboni okuliqiniso lamanga, okuhle lokubi kunzima nje yikuthi konke lokho akwehlukanise uzethesa umthwalo wokutshontsha ucingo etshayela uJoza omqambela lamanga ngelithi yena kakho emsebenzini, ehutshuza aluhlaza tshoko. Konke lokhu uyakukholwa kaboni size kikho, khona nje ukunanzelela ukuthi uJoza udlala ngaye. Kunjalo ke empilweni abantu bazithola bephakathi kwesimo sika MaMsie kuqakathekile ukuvusa inkophe empilweni ungabi ngunodoli ofana loMamsie.
Ngokuswelekala kuka Joza ecingweni ngapha kuMamsie kwakungathi ngumdlalo nje, UJoza usamthanda wayengafuni njalo ukumcabangela okubi. Wabuye wahlala phansi wadobha usiba lephepha walobela lesi sithandwa sakhe esinguJoza. Wabika uthando lwakhe wabika isizungu ayelaso waze waquma lokuthi kwakumele babonane.
Lapha sinanzelela ukugqilazwa luthando okwakumhlasele kanye lokufiphala komcabango kukho konke nje okwenzayo. Siyagqilazwa isifazane esinengi ngendlela esiyibona kuMaMsie lapha. Kukanti kuqakathekile ukufunda ngokubona Kanye empilweni ungaze waziduduza ngokufuna ukufunda kokwesibili.
Wayamukela uJoza incwadi yothando. Wayivula encifa kakhulu ezisola ezikhala ngelithi lakanye wazenza walutheza olulenkume. Wabona uMamsie eyisinama esinzima ukucutha empilweni, yena uJoza wayengasaboni thando lapha kodwa ebona isiwula nje.
