uMthunywa
Imikhuba laMasiko AmaNdebele
Ugwalo lulotshwe nguTommy Matshakayile Ndlovu loDoris Nomathemba Ndlovu
Belo Bekithemba S Ncube
Ludindwe yiMambo Press
Ake sizwe ngokucaba umuzi weNdebele
Nxa indodana isisiya kwakha owayo umuzi kwakumele uyise ayeyitshayela ihlahla. Kuthiwa endulo kwakuzila ukuthi indodadana iphume emzini wakwabo ingatshayelwanga ihlahla. Ukutshayela indodana ihlahla kwakungumkhuba wesiNtu. Nanzelelani bafundi ukuthi ngisebenzisa isikhathi esedlulileyo lapha ngoba okukhulunywa lapha akusekho sekulivela kancane.
Ukutshaya ihlahla lokhu kwakusenziwa nguyise womfana ngemva kokuba esebikile kuyise ukuba usekhulile, njalo usefisa ukuthi athi tshedu ngekhaya.
Lokhu kwakuvame ukuthi kwenziwe yindodana endala njalo esithethe. Kwakungandanga ukuthi kuphume mncinyane kungakaphumi indlalifa, mjalo omncinyane wayengaphumi ngoba nguye owayelondoloza abazali.
Masikunanzelele ukuthi ngensuku zalamuhla zikhona indlalifa ezalela ngekhaya kuze kuphume omncinyane. Nxa sekuvunyelwene-ke uyise wendodana wayevuka ekuseni aphume layo indodana, athathe ihloka baye kuleyondawo esibonwe yindodana. Wayefika agamule ihlahla kwesokudla kweguma alidonsele phakathi laphakathi kwalo iguma kumbe sithi lapho okwakuzakuba legume khona.
Wayesenza njalo lakwesokhohlo. Kwakukhona izihlahla ezizilayo njengabomphafa, osihlangu labo chithamuzi. Uyise edonsa amahlahla lawo wayebikela abaphansi esethula indodana le kibo. Wayethi nansi indodana yakhe uyethula kuboyisemkhulu, ethi ubani uzatshela usibani laye atshele abanye ukuthi ubani uthe usekhulile, usefuna ukubakhela umuzi. Wayesitsho ukuthi bamuphe inhlanhla, inotho yokudla kanye lezifuyo, inhlalakahle kanye lenzalo.
Kwakudingwa njalo losiyazi azephunga imoya yezikhova. Wayebethela umuzi lowo ukuze awuqinise. Nxa uyise wendodana eyindoda eqinileyo elolwazi ngezihlahla wayekwenza yena konke lokho. Lokhu kuthiwa kwakusenzelwa ukuxotsha lokuvimbela abathakathi kanye lokunye okubi. Umuzi wawubikelwa ngezigodo kutshiywe intuba entshonalanga komuzi ukwenzela ukuthi abafikayo babonakale lula. Kwakusenzeka ukuthi zibembili ngokuthanda komninimuzi.
Ukuqiniswa komuzi ngemithi. Ukubethelwa kwemizi yikwelatshwa kwayo. Kwakuthiwa yikubethelwa kwesikhonkwane. Izikhonkwane zazehlukene. Kulezinto ezazifanele ukwenziwa emizini eyehlukeneyo,ezinjengokungena lamagciko, kumbe ukungena lamanzi ilanga selitshonile lokunye okunjalo.
Esibayeni lakho izifuyo zaziselatshwa kuthiwa liziko lenkomo kumbe umthuso. Amasimu lawo ayeselatshwa kuthiwe lidibisi. Lokhu kwakusenzelwa ukuthi izifuyo lamabele kungaze kwachitheka kodwa kwande.
Kwakusenzeka ukuthi enye indodana ibe lihlongandlebe ixane loyise. Phela umzali uyancengwa loba ephambanisile. Kwakufanele indodana imtshelele abafowabo bazekhuza.
