uMthunywa
Innocent Kurira
UMANEJA wohlelo lweFifa Forward kuleli uKudzai Chitima uthe imidlalo yeCaf African Schools Football Championship, Cosafa Qualifiers ezaqala lamuhla eHarare izatshiya imbali ngenhlelo zayo zokuthuthukisa abadlali.
Imidlalo yeCosafa le izaqhutshelwa esikolo seGateway High eHarare. Umqhudelwano wezikolo lo udibanisa amaqembu abafana lamantombazane abaleminyaka engaphansi kwe-15 yokuzalwa, avela emazweni alitshumi angaphansi kwe-Cosafa.
Ngomnyaka ozayo kuzaqhutshwa umncintiswano omkhulu e-Africa.
Andubana imidlalo iqalise, kuqhutshwe izifundo zokuqeqetsha ezeCaf D Licensing, eziphethwe ngoLwesibili. Kufundiswe abaqeqetshi abangamatshumi amathathu, abavela kuzabelo zonke zelizwe. UChitima wazise intatheli yeZimpapers Sports Hub ukuthi izifundo zabaqeqetshi ziqhutshwe kakuhle njalo sebelinde ukuthi kuqale imidlalo.
“Izifundo zabaqeqetshi zihambe ngendlela ebesiyikhangelele. Sibelokuthaba ekuthini kube labaqeqetshi abanengi. Abanye sicine sibavalele phandle ngoba sekugcwele.
“Senze kuhle ukuthi sibe lequla labaqeqetshi besifazane abangamatshumi amahlanu, lenani labesilisa abalinganayo,” kutsho uChitima. Uthe phakathi kohlelo lwabo kuzakuba lezifundo zentatheli kunye lezalabo abasebenza kwezempilakahle kwezemidlalo.
“Sisungule izifundo zentatheli zomdlalo wenguqu ezisakhulayo. Inhloso yethu yikuphakamisa abantu abanengi, abavela endaweni ezitshiyaneyo. Imidlalo le izatshiya ilifa elizweni.”
Amaqembu ezikolo ancintisayo avela emazweni abalisa i-Angola, Botswana, Eswatini, Madagascar, Malawi, Mozambique, Namibia, Seychelles, South Africa, Zambia leZimbabwe.
