uMthunywa
Nkosilathi Sibanda
NGOKUVULWA kwezikolo kulithemu, kuqalwe njalo amalungiselelo emincintiswano yokugijima ngesikhathi sokuvele imibiko yokuthi izikolo ezinengi zidinga usekelo.
Eminyakeni edluleyo imidlalo yokugijima le ibithola usekelo oluthile kumankampani kodwa ngenxa yesimo somkhonomi welizwe, kusuke kwancipha esikhwameni samankampani amanengi, osekudala ukuthi kube lokusilela kwemali ephathisa kwezemidlalo.
Inengi labaphathi bezikolo abaxoxe lentatheli yeZimpapers Sports Hub bathe kulusizi ukuthi ithalenta lesizwe elisacathula ezikolo liswela usekelo.
Ukuba khona kosekelo lwamankampani kwabonakala kuyinto enhle ngoba kwaphakamisa izinga lomncintiswano wokugijima kunye lokubeka ithemba kuthalenta lezemidlalo.
Esabelweni seMatabeleland North, amalungiselelo okugijima aseqalisile. Iphephandaba likazulu lixhumane lababalisi abaqeqetsha abantwana abagijimayo kuziqinti zesabelo seMatabeleland North iBinga, Nkayi, Tsholotsho, Umguza, Hwange, Lupane leBubi ababike ukuba sebelungiselele.
KoBulawayo imincintiswano yezikolo ze-secondary iqala kusukela mhlaka 15 Nhlolanja lapho iziqinti ezizaqhuba imicimbi ngensuku ezitshiyeneyo lapho zilungiselela ukuncintisana kwezigaba kusukela mhlaka 7 kusiya ku-8 Mbombitho.
Izikolo zamabanga aphansi zenze imiqhudelwano yazo yama-inter-house ngeviki eledluleyo, ikanti izabelo ezehlukeneyo zidibana mhlaka 29 kuNhlolanja kusiya ku-1 kuMbimbitho eWhite City Stadium.
Izikolo ezinengi zibika ukuba sezigijimela phambili ngoba zihlose ukubusa kumincintiswano le yalonyaka.
Umgcinisihlalo weNational Association of Secondary Heads esabelweni se-Arthur Maphosa uthe okwakhathesi iziqinti zonke ziphitsheka ngokulungisisa okuthile kumathimu azo.
Lonyaka kubikwa imidlalo ye-physical education egoqela le-gymnastics izabe ikhona njalo.
“Umdlalo we-gymnastics ophuma kuzifundo ze-Physical Education uzancintiswa njalo ngabantwana abangaphansi kweminyaka engu-11 yokuzalwa,” kutsho uMaphosa.
Uthe abantwana abanengi sebevuleke amehlo ngokuqakathekisa ithalenta lokugijima kanye lokukhuthalela ezempilakahle.
“Inhloso yalimincintiswano ngeyokuthi abantwana bavuselele amathalenta abo, ayiwo azabaphilisa kwelakusasa.”
