uMthunywa
Nkosilathi Sibanda
ABADLALI bethenisi abasakhulayo abavela kumaqembu aphezulu elizweni bazahlangana ngenyanga ezayo kumncintiswano we-Emakhandeni Tennis Club Invitational, ozaqhutshelwa ezinkundleni zeBulawayo Athletics Club (BAC).
Abadlali abaleminyaka yokuzalwa ephakathi kwetshumi kusiya kutshumi lasitshiya galombili bazancintisana okwakuqala kuleli, lokhe kwaqalisa umnyaka.
Kuhlelwe ukuthi kudlalwe mhlaka 22 kusiya ku-24 Mbimbitho. Abaqoqi bemidlalo le babike ukuba bakhangelele ukuthi abadlali abanengi babhalisa ukuncintisa nanko phela baphuma ekhefini elide, kusukela ngomnyaka odluleyo.
Umqondisi weMakhandeni Tennis Club, uWitness Jiyane utshele iZimpapers Sports Hub ukuthi balindele ukwamukela abadlali abedlula amatshumi ayisithupha.
“Siyajabula ukubika ngomncintiswano wethu wakuqala lonyaka oweMakhandeni Tennis Club Invitational. Sikhangelele abadlali abedlula i-60 ukuthi bancintisane. Laba ngabadlali abavela ezindaweni ezehlukeneyo elizweni.
“Bakhona abavela eHarare, Gwanda kunye leMasvingo. KoBulawayo kulabadlali abalolonga ezikolo zeCharleston Trust, Northlea High, Emakhandeni Primary, Josiah Chinamano, Girls College, Whitestone Primary lezinye ezithembise ukubisa abadlali bazo kunsukwana ezilandelayo,” kutsho uJiyane.
Uveze ukuthi umqhudelwano wabo usekelwe ngemali ngamankampani eSelect Health Care leMiravana Transport.
Ubonge kakhulu lamanye amankampani asekele iMakhandeni Tennis Club kuminyaka edluleyo. “Ngithanda ukubonga abasekeli bethu bakuqala, Inkampani yePPC, Chicken Inn, Hope Pharmacy kunye leMiravana Logistics. Samukela njalo iHealth Select lonyaka, silethemba lokuthi izahlala ilathi, kumsebenzi wethu wokuphakamisa ithalenta labasakhulayo.”
UJiyane uthe kusenhlelweni zabo njengeMakhandeni Tennis Club ukuthi baqoqe imidlalo inyanga zonke.
“Inhloso yethu yikuthi siqoqe umncintiswano wodwa inyanga yinye ngayinye ukuze sigcine abadlali beqinile, sibalungiselele imncintiswano ezayo ngoMabasa.”
Imidlalo yeMakhandeni Tennis Club isiphakamise abadlali abanengi asebethole ukufunda mahala kumakolitshi lasezikolo zaphetsheya ababalisa uKuzivaishe Chapepa, ohamba phambili kubo bonke e-Africa, udadewabo uKudzai, Shain Tapera, Emmly George, Akeelah Khanye, Zamani Moyo, Courage Ndlovu, u-Isaac Nyoni loMunashe Bera.
