uMthunywa
YiNtatheli kaMthunywa
ISIQALILE imidlalo ebilindwe okweminyaka emine, eyeFifa World Cup ezweni leRussia.
Inkundla zivulwa lamuhla lapho okuzahlangana khona iRussia leSaudi Arabia enkundleni yeLuzhniki. Kodwa okusuke kwahlabusa anduba kuvulwe umkhosi wenguqu lo yikuziphatha kwabadlali beMexico.
Kubikwa iqembu lonke leMexico likhethe ukuthi liyejabula labonondindwa abangamatshumi amathathu kulungiselelwa ukuyancintisa eRussia.
Amaphephandaba akulelo abika ukuba ngoMgqibelo odluleyo iMexico yabonakala ibhoda endaweni zokuzikholisisa edolobheni leMexico City. Omahotsha abanxuswa lapho kubikwa babebiza intengo ephezulu.
Lokhu kuvele ngemva kokuba onozindaba beTVNotas bekhiphe imifanekiso yabadlali laba bepusuka enzikini yedolobho leMexico City.
Abadlali ababonakala bekholisa kakhulu babalisa uRaul Jimenez, Guillermo Ochoa, Jonathan dos Santos lomfowabo u Giovan, uMarco Fabian loCarlos Salcedo.
IMexico ihlezi ikumaphephandaba ngesikhathi seWorld Cup ngenxa yokungaziphathi kakuhle kwabadlali.
Ngomnyaka ka2010, ngemva kweWorld Cup yaseSouth Africa, abadlali beMexico bagida labomahotsha njalo.
Kodwa, izikhulu zeqembu leMexico zithe abadlali abaphambanisanga lutho ngoba babezijabulela ngesikhathi sabo.
UGuillermo Cantu usibalukhulu weMexican Football Federation uthe angeke bathese abadlali icala.
“Abadlali bakhona nxa silolonga njalo bebejabula ngesikhathi sabo. Babephiwe ithuba lokuthi batshaywe ngumoya.
Kusenjalo, umdlalo wakuqala weWorld Cup phakathi kweRussia leSaudi Arabia uzaqalisa ngehola lesihlanu ntambama.
Uluhlu lwemidlalo yehlandla lakuqala:
14 Nhlangula: Russia v Saudi Arabia
15 Nhlangula: Egypt v Uruguay, Morrocco v Iran, Portugal v Spain
16 Nhlangula: France v Australia, Argentina v Iceland, Peru v Denmark, Croatia Nigeria
17 Nhlangula: Costa Rica v Serbia, Germany v Mexico, Brazil v Switzerland
