uMthunywa
Nkosilathi Sibanda
ABATHANDI labadlali benguqu kuleli bazakhonona bengaqedi njalo bazakwamukela ngokudana okukhulu ukuthi iqembu lesizwe kumdlalo wenguqu amaWarriors lizadlala imidlalo yalo kweleRwanda.
Lokhu kudalwe yikuthi iZimbabwe kayilankundla elakho ukuphatha imidlalo yaphezulu ngoba inkundla zakuleli zikusimo esiphansi, esingafinyeleli okufunwa yinhlanganiso yeConfederation of African Football (Caf).
Imidlalo yamaWorld Cup Qualifiers izaqalisa ngeviki lesibili kunyanga kaLwezi.
Ngokunjalo, kuliviki liphumile iqiniso lokuthi amaWarriors azadlalela eRwanda, kumidlalo yokukhankasela ukuya kumidlalo yenkezo yomhlaba ka20226.
Iqembu lamaWarriors lizakwamukela iNigeria enkundleni yeHuye Stadium, edolobheni leButare eRwanda, ngokutsho kwenhlanganiso yeZimbabwe Football Association (Zifa) kuliviki. Kube ngaphezulu kwamandla eZifa nanko inhlanganiso yeCaf kayizange yesule isinqumo sayo sokuvimba ukusetshenziswa kwenkundla zakuleli.
Kumbali yenguqu yakuleli, lokhu akukaze kwenzakale. Yisiqalo lesi.
Iqula leZifa Normalisation Committee belikhangelele ukuthi imidlalo yokukhankasela ukuya kuWorld Cup ka2026 izaqhutshelwa enkundleni yeRufaro Stadium laseNational Sports Stadium inkundla zombili eziseHarare zehluleke ukufeza imfanelo efunwa yiCaf ukuze imidlalo edibanisa amaqembu amazwe iqhutshwe.
National Sports Stadium
Inyathelo lokuthi imidlalo yamaWarriors ibe seRwanda idalwe ikakhulukazi yikuvala indleko zokuthi amaWarriors azabuyela eningizimu ye-Africa iphinde iqhube imidlalo yasekhaya isenkundleni zamazwe angomakhelwane, iZambia kumbe iSouth Africa.
AmaWarriors akuqula lika-C lapho okule-South Africa, Lesotho leBenin.
