uMthunywa
Nkosilathi Sibanda
NGENYANGA ezayo imidlalo yebhola lenyawo kuligi ephakemeyo eyePremier Soccer League (PSL) iyaqalisa kodwa indlela inde kumaqembu alokhe ebika ukuthi awalamandla wokukhipha inkulungwane zemali yokuhlola abadlali umkhuhlane weCovid 19.
Iphephandaba likazulu liphethe udletshana lodaba oluthi amaqembu athile asephakathi kokubhalela iPSL incwadi ekhalaza ngokuthi adinga usizo.
Inhlanganiso yePSL isibeke isinqumo sokuthi anduba kuqhutshwe imidlalo yonke, iqembu ngeqembu kumele lihlole abadlali lezisebenzi ezizakuba yingxenye yemidlalo.
Mhlaka 15kuNkwenkwezi kusungulwa umncintiswano ozadlalwa yiwo wonke amaqembu alitshumi
lasitshiyagalombili. IPSL yethula umbiko wokuthi kumele isinqumo lesi silandelwe.
Amaqembu kumele alandele izixwayiso. Ukuhlolwa kuzenziwa ngabezempilakhale abalotshiswe ngaphansi kogatsha lwezempilakahle lokondliwa kwabantwana kuHulumende njalo lokho kuzahlolisiswa yikomithi yezemilakahle yePSL.
Ikomithi le izengezwa kufakwe labodokotela abalitshumi lanhlanu. Abadlali lezisebenzi zeqembu bazahlolwa ngohlobo lwePCR andubana kuqalwe ukulungiselela imidlalo.
Kubikwa labo abazabanjwa belegcikwane bazakhuthazwa ukuthi bayehlala bodwa njengokuphawulwa kwezinqumo.
Umaqhuzu wePSL uKennedy Ndebele uthe bayasuthiseka ngokuzimisela kwamanye amaqembu aseqale ukuhlabisa abadlali ijekiseni yokwenqabela iCovid 19.
Kusukela ngeviki eledluleyo amaqembu abalisa iChicken Inn, iHighlanders, iBulawayo City leBulawayo Chiefs atshengisele ukuthi azalandela izinqumo ezintsha ngokuqala amalungiselelo.
Inkinga okukhanya izahlasela phose wonke amaqembu ngokuya kwesikhathi yikuthola imali yokuhlola abadlali.
Iphephandaba likazulu lixoxisane leziphathamandla zamaqembu athile akuligi enkulu ezibike ukuba kunzima, ikakhulu nxa kukhangelwa ukuba amaqembu awala sekelo lwemali eneleyo.
“Siqede umnyaka singenzi imali ngakho akusoze kwaba ngumsebenzi olula ukuhlola abadlali mihla ngemihla,” kutsho esinye isikhulu selinye iqembu elidlala koBulawayo.
Kumncintiswano lo ozaqala mhlaka 15 Nkwenkwezi, inhlanganiso yePSL ikufaka sobala ukuthi kuzamele amaqembu akhuthazwe ukuthi atshele abadlali bayehlatshwa ijekiseni, loba nje kungela umuntu obanjwa ngamandla.
“Inhlanganiso yeWorld Health Organisation icebisa ukuthi ukuhlatshwa ijekiseni kuyanciphisa amathuba wokubamba iCoronavirus. Inhlanganiso yePSL izathola iseluleko esivela kugatsha lwezempilakahle kulokho,” kutsho ugwalo lwalinhlanganiso olumumuthe indlela umncintiswano wakuqala ozaphathwa ngawo.
Ukuhlohlwa iCoronavirus ngohlobo lwePCR kubiza i$60 kusiyaphezulu umuntu munye ngamunye, okuyikhona okudida amakhanda abaphathi bamaqembu la.
