uMthunywa
Mthokozisi Dube eseHarare
INTSHANTSHU zomdlalo kanobhutshuzwayo kuleli iqembu leCaps United zinqobe iqembu lakwele Algeria iUSM Alger nge 2-1 kumdlalo we Caf Champions League odlalelwe enkundleni yeNational Sports esigodlweni izolo.
Abafana beMakepekepe bangene kulo umdlalo beyimbabazane kulandela ukunqotshwa kwabo liqembu lakwele Egypt iZamalek nge 2-0 emavikini amabili edluleyo.IMakepekepe ibiqine kakhulu esiswini lapho uTafadzwa Rusike, loMoses Muchenje kanye loRonald Chitiyo abakade bezidlalela santando. IMakepekepe ibilamathuba amanengi kusigaba sakuqala kodwa yehluleka ukutshaya amambule kanengi nengi.
URonald Chitiyo ulisebenzele kanzima ibhola kulandela ukulitshintshana loPhineas Bamusi anduba alahlise unozinti wezivakatshi uMohamedi Lamine Zemmamouche ngebhola ebelizigiqikela lingelamfutho.URonald Pfumbidzai ubebone angani umlandu wakhe sewuqedile kulandela ukuhlohla kwakhe ibhola lesibili kodwa umsizi kanompembe walilandula ibhola lakhe ngoba ubefuna ukutsheba abanye bengakagezi izandla.
Abafana beMakepekepe baze bengasadlanga nkotshane kusigaba sesibili. UTafadzwa “Fire” Rusike ugezise imvimbi ze-USM Alger bamgwenxa ebhokisini kodwa unompembe wakweleBurundi uThiery Nkurunziza wathi vuka ndoda, akwenzakalanga lutho kukanti abalandeli beMakepekepe bebekhangelele ukuthi akhombe esilotheni.
IUSM Alger izame ukuhlasela ngomgadli wayo waphambili uAbderrhmane Meziane kodwa unozinti weCaps uEdmore Sibanda walivimba kalula ibhola lakhona. Izivakatshi zibuye sezihlasela njalo ziphose zalithela emambuleni kulandela ukuthi iCaps ibisivimba kuphela ingasahlaseli.
Unozinti weCaps uEdmore Sibanda udonse ithulisa mntwana esanda kudlula enzikini yenkundla okwenze unozinti weUSM Alger alifuqele eceleni kwentuba.
UAyoub Abdellaoui utshiye uEdmore Sibanda ebambe iziboya ngesikhathi ehlohla ngekhanda ibhola lakhe lokulinganisà.
URonald Chitiyo ubuye njalo wavuthela amambule ngemva kokutshiya amadoda enabile ebhokisini. Ukunqoba kweMakepekepe kuyitshiya ilemiklomelo emithathu itshiywa yiZamalek ngomklomelo owodwa.Umqeqetshi weMakepekepe uLloyd Chitembwe utshengise ukusuthiseka ngemiklomelo emithathu wabika ukuthi bazakhangela umdlalo munye ngamunye kulo umkhankaso.
