uMthunywa
YiNtatheli kaMthunywa
UMDLALO wenguqu esabelweni seMatabeleland North uyaphambili kulandela ukusungulwa kweqembu leLukosi Pirates elibika ukuthi lizimisele ukudlalisa ithalenta eliphuma emaphandleni esinqinti seHwange kuphela.
Iqembu leLukosi Pirates labunjwa ngesizini ka2015 njalo lilabadlali abangaphansi kweminyaka engu-25 abalesifiso sokuthi baqhubekele phambili ngokunqoba bafinyelele ukuncintisa kumaligi aphezulu.
Umaneja omkhulu walileqembu uPeterson Ncube ubike ukuba ithimu yabo yasungulwa ngabafana abasakhulayo abalothando lomdlalo wenguqu abakubona kufanele ukuthi babumbe iqembu elizaphathisa ukubonakalisa ithalenta elikhona esigabeni sabo.
Abadlali bakuqala baleliqembu kubikwa bavela enzikini yeLukosi Growth Point, indawo engamakhilomitha alitshumi lantathu kusukela edolobheni leHwange. Iqembu leli libika ukuthi lifuna ukukhipha abadlali abazabatshazwa ilizwe lonke, abazadlala bafike kuzinga lencgitshi ezifana loPeter Ndlovu.
“Iqembu leLukosi Pirates labunjwa ngomnyaka ka2015 ngabasakhulayo abadlali ibhola labasekeli babo. Ngemva kokunanzelela ukuthi kulethalenta elingasetshenziswa ngemfanelo phakathi kwabo, abadlali babopha isinqumo sokuthi bahlangane kube leqembu elizaphakamisa indawo yabo kanye labo.
“Ngokunjalo, iLukosi Pirates izaqina ngokudinga abadlali benguqu abaphuma kulindawo yeHwange, ikakhulu emaphandleni. Abadlali benguqu kumele bancediswe ukuze behlukane lokuxabana lomaphakathi. Nxa ithalenta likhona, kungumlandu wethu ukuthi sincedisane siphakamise abasakhulayo. Akwaziwa, mhlawumbe singahwatshwa uPeter Ndlovu,” kutsho uNcube.
ILukosi Pirates okwamanje igijimisa abadlali enkundleni yayo yesikolo seLukosi Secondary, okwenza kubelula ukuthi labafundi balesisikolo baphatheke kumisebenze yeqembu.
Uncube wengeze ngokubonga ikhansili yeHwange Rural District Council ngokusekela iqembu.
“Iqembu lethu libonga kakhulu ikhansili yeHwangwa Rural, inhlanganiso yeZimbabwe Football Association eMatabeleland north. Ikhansili yethu incedise ukuthi sibhadale ezinye indleko zenhlanganiso yeZifa.
Umgcinishlalo weZifa eMat North uDennis Tshuma ubike ukuba ulokuthokoza ngokusungulwa kwamaqembu afana eLukosi Pirates.
