uMthunywa
Sikumbuzo Dabengwa
Thatha intombi lejaha abagqibileyo ezikolo lapha ubone ukuba ikhefu labo bemelele impumela balichitha besenzani. Kunengi okwenzakalayo bakwethu. Umbuzo usekuthini esikwenzayo bafundi kusitshiya singabantwana abaphephileyo yini.
Sivikelekile yini emcabangweni kanye lasemizimbeni yethu na? Nxa umfundi enganazelelanga angazithola esezingenise komlindi uyacina. Kubi lokhu bafundi. Sikhangelele abantwana abakhuthalele konke okuthuthukisa umuntu okubalisela imisebenzi yangekhaya kanye lale ethuthukisa inzuzo emulini.
Akhona amajaha lamantombazana angasibekiyo isinqe phansi. Hatshi ngoba bethengisa okungathengwayo kodwa bencedisana labazali kumisebenzi ethile egumeni. Yiyiphi imisebenzi engenziwa yithi silindele ukuphuma kwempumela yemihloliso kaLwezi? Omunye angaqamba:
a) Ukulima
b) Ukufuya
c) Ukufundela imisebenzi yezandla enjengokupheka, ukuthunga, ukutshayela nxa ulencwadi ekuvumela ukufundela lokho, imidlalo, ukuloba, ukuhlabela njalo njalo.
Kunengi bafundi okungenziwa ngekhefu lokumelela imihloliso, sinanzelela ukuba kwabanye lizabe lilide ngoba izindawo zokuqhubekela phambili zivulwa ngemva kwesikhathi.
Siyakhuthaza-ke bafundi ukuba omunye lomunye azihlole abone ukuba kuyini angakwenza ngalelithuba okuzamtshiya ethuthukile hatshi ukuba ngugeza sidle.
Siyakhalima njalo kulabaya abangamavila kodwa bakhuthalele unyawo kubhodwa lamabholoho, acina ebalinga ngokubi. Ivila siyazi bafundi ukuba kuthiwa alingadli. Pho thina ukudla njengoba sikuthanda kangaka asibonisaneni labadala siphume lezinto ezibambekayo, ezilomsoco hatshi ukuhlala nje.
Sikhuluma kunje inengi liyaphenquza emasimini. Olufikele ukulima lusadalala luvuka ngovivi kuyiwa emasimini. Izintombi angikhulumi eziphathisa ekulimeni yizo ezivuka ngovivi lazo zilungisa onhlanyelo kanye lakho konke okuya ethunjini.
Abasendimeni abakuthandi ukuba labo abasele besenga kuphekwa isikhululamabhatshi baphuze ukufika lokudla lokho emasimini.
Ezikhutheleyo izintombi zithi zingaqhuba lokho kudla zona zingene ekubambeni ikhuba lenkabi, zitshe oBlomu sebekhuzwa yintombijaha elolwazi lomsebenzi lo esasisazi ungowamajaha labobaba kuphela.
Ngiyafunga akhona amantombazana afundiswe kuhle ukubamba ikhuba abuye ajinge aphose athathe isicoco salokhu. Ngokunjalo akhona amajaha angabamba konke esasisazi kusenziwa ngowesintwana kodwa akwenze ngezinga eliphezulu.
Siyagqugquzela ekukhuthaleni bafundi lanxa nje selisithi kulezi izinsuku sebenza ungazigqilazi/sebenza kalula, siyavuma kodwa kokunye iminwe ayilingani. Zisasebenza izindlela zabokhokho bethu, kudliwe ekhaya silale ngesibomvu.
Nanso ingqobe isisalele lina bafundi. Nxa kuvuma asiphakameni sibelusizo ngoba kungekudala ziyavulwa.
