uMthunywa
UYABALISA ngethuba lokulobola iKaizer Chiefs eliyekwe ngabadlali bakhe umqeqetshi weMaritzburg United, u-Eric Tinkler, ohlanganise amaqhinga kwadideka iqembu elisatshwayo kulezi zinsuku.
Kuzobe kungokokuqala iTeam of Choice idlala kumdlalo we-final yenkezo yeTelkom selokhu yasungulwayo. Umdlalo lo leSundowns useMoses Mbhida Stadium, eThekwini mhlaka 14 Mpalakazi. UTinkler kodwa uyakhala ngethuba lokucobodisa iChiefs eliyekwe ngabadlali bakhe.
Ucine ewanamathiselile amabili enethini uJudas Moseamedi kodwa ungomunye wabadlali abalecala ngokwekela inqwaba yamathuba alula.
Kusemqoka lokho ukukuqaphela ukuthi usebenze kakhulu uBruce Bvuma obevimbele iChiefs ukuyisindisa ehlazweni lokunanabulwa kabuhlungu.
“Iqiniso lapha yikuthi singabe sinqobile kodwa bekumele sinqobisise. Esigabeni sakuqala bengingakholwa ukuthi yithi laba abadlala kahle kanje. Konke obekufanele kwenziwe ngokwahlukana enkundleni kwenziwe ngendlela. Ngokwami bekumele okungenani siye ekhefini sihamba phambili ngo 3-0 loba ngaphezulu. Ngendlela ebesiwayeka ngayo amathuba alula bekulokhu kubuya emqondweni wami ukuthi kungaphenduka kube yinkinga kithi,” kutsho uTinkler.
Umqeqetshi lo oyibambe ngaphezulu iMaritzburg ngesizini edluleyo uthe ubathembise izulu lomhlaba abadlali bakhe.
“Manengi amathuba amahle esiwathole kwesokuqala isigaba kodwa lakwesesibili abelokhu evele njalo futhi emahle kulawesigaba sakuqala.
Indaba ye-free kick ibuyisa iChiefs nje enye yezinto ebengibadonse ngendlebe ngayo abadlali. IChiefs siyihlule ngakho konke lamuhla. Ubungafunga ukuthi thina ebesidlalela ekhaya,” kutsho umqeqetshi lo.
Uyakhala kodwa uTinkler ngethuba lokuyeka iChiefs ivumile.
“Bekumele sibalobole. Kungiphoxile ukuyekwa kwawo ngeke ngikhulume iphutha. Ngijabulile ukuthi siyakumdlalo wenkezo.
Engikukhulekelayo yikuthi kungabi ngumkhuba wethu ukuyekela amathuba afana lalawa ngitsho loba sidlala kuphi lobani sibanga ini.” — Ubulembu
