uMthunywa
Gladmore Ncube
INHLANGANISO ekhangela ngezemidlalo ye-karate iZimbabwe Karate Union (ZKU) ikhuthaza abadlali bomdlalo lo ukuthi babophe amajombo njengoba umncintiswano wenkezo le susondele.
Umncintiswano lo uzakuba khona mhlaka 17 Mpandula eHarare lapho abadlali be-karate abazabe bethubulana khona kunkezo yeJapanese Ambassador Cup.
Intatheli ikhulumisane loSensei Spider ongumqeqetshi wabadlali be-karate esabelweni seMatabeleland South njalo esebenzisana leZKU othe uyajabula ngoba umncintiswano walonyaka uvulelwe loba ngubani ongumdlali we-karate.
“Siyabonga umsebenzi omuhle esiwenzelwe yi-Japanese Embassy ngokusiphathisa ngemali enze ukuthi umncintiswano lo uphumelele.
“Umncintiswano walonyaka muhle ngoba uyavumela loba ngubani ongumdlali we-karate ukuthi ahambe ayencintisana labanye abadlali abavela endaweni ezitshiyeneyo zakuleli. Izabelo zonke ziyabe zikhona emncintiswaneni lo.
“Umncintiswano lo uqakathekile ngakho-ke abadlali kumele bawuthathele phezulu ngoba uzabapha ithuba lokuthi bengenza kuhle bakhethwe ku-National Karate Team yeZimbabwe. Kulendondo lezinkezo ezizabe ziphiwa labo abazakwenza kuhle,” kuchaza uMnu Spider.
Uqhubekele phambili uMnu Spider echaza ubunzima abahlangana labo kwezemidlalo ye-karate. Uthe uhlupho abahlangana lalo kakhulu yikuthi imincintiswano le ivame ukuba khona ngesikhathi izikolo zivuliwe okwenza abanye abadlali bangenelisi ukubakhona.
“Imincintiswano yethu ijwayele ukuba khona nxa izikolo zivuliwe osekwenze sehluleka ukuthi sibe lenani labadlali abasesikolo abadlalela iqembu lesizwe ngoba kuvame ukuthi ngesikhathi sikhetha labo abazangena ku-national team abantwana besikolo bayabe beloba imihloliso yabo. Yikho nje lonyaka sikhethe ukuthi umncintiswano lo ubekhona ngesikhathi izikolo zisanda kuvulwa,” kuchaza uSpider.
UMthunywa uthintane njalo loPaul Danisa ongumqeqetshi weqembu lesizwe i-national karate team othe selusondele usuku njalo bakhangelele ukuthi bathole abadlali abatsha abazadlalela iqembu lesizwe.
“Umncintiswano sufikile ngakho-ke sikhangelele ukuthi abadlali bazimisele benze kuhle ngoba lonyaka sifuna ukuthi sikhulise iqembu lesizwe ukwenzela ukuthi senelise ukunqoba amaqembu amakhulu afana laboSouth Africa lamanye nje amazwe.
“Umdlalo we-karate ayisiwomdlalo othakazelelwa nguye wonke umuntu ngoba esikhathini esinengi sibalabo abacina sebekhalala umncintiswano ungakapheli ngoba lumdlalo ulokutshayana okukhulu ngakho abadlali ababophe ziqine ukuze banqobe,” kuphetha uDanisa.
