uMthunywa
Nkosilathi Sibanda
IQEMBU lenguqu elitsha, iPlumtree Wanderers lifuna ukwakha ibizo emdlalweni njalo lilezifiso zokufinyelela phezulu nanko lizadlala kuligi yeZifa Division Two, esabwelweni seMatabeleland South.
Umqeqetshi walo nguJohannes Tshuma, indoda eyadla ubhedu ingunozinti kuHighlanders, Eagles, lakuHwange. Umqondisi weqembu uMenzies Manka uthe abadlali babo bazathola ulwazi kuTshuma njalo njengenkokheli bayamethemba lumqeqetshi ukuthi uzagcwalisisa izifiso zabo zokuthi kusekelwe ithalenta elisePlumtree lakundawo eziseduzane.
“Sibonga umqeqetshi ebesilaye siqalisa uTau Murangwana. Iqembu liqhatshe uJohannes Tshuma endaweni yakhe. Siyamethemba uTshuma ngoba sikholwa ukuthi ulwazi lobuciko alabo buzaphathisa kakhulu. Sifuna ukuthi sidume kuzo zonke indawo zePlumtree,” kutsho uManka.
Uthe ukuba khona kukaTshuma kuzaguqula isimo somdlalo wenguqu koBulawayo.
“Ukuba khona kwakhe kuzatshintsha okunengi. I-Plumtree izakuba yindawo ezakuba lodumo emdlalweni. IPlumtree Wanderers izabe idlala kuligi kaDivision Two kodwa sifuna ukuthi uTshuma asifikise kuDivision One.”
UTshuma usedonse isikhathi esemdlalweni. Etshiya ukudlala, wakhetha ukuba ngumqeqetshi wabonozinti, wenelisa ukunqoba izicoco ezinengi.
Wasebenza njalo eBotswana lapho ayeqeqetsha khona iqembu le-Ecco City Greens.
Kusenjalo, kukhangelelwe ukuthi iPlumtree Wanderers ivezwe emphakathini kulinyanga, andubana kuqalwe iligi.
Ekhuluma leZimpapers Sports Hub uTshuma uthe indawo yePlumtree igcwele ithalenta lomdlalo wenguqu, ngakho uzafuna ukuthi aqine ngokulolonga abadlali abadabuka kulindawo.
“Ngiyasuthiseka ngethalenta elikhona. Bagcwele abadlali abalesiphiwo, kuzaba kuhle ukuthi njengabaqeqetshi sixhase ithalenta esilibona lapha.
