Ifuna iPSL iFilabusi United

14 Mar, 2019 - 00:03 0 Views
Ifuna iPSL iFilabusi United Iqembu leFilabusi United

uMthunywa

Bongani Ndlovu 

BEKUNGABIZWA ozwayo ngempelaviki edluleyo iqembu leFilabusi United lihlangana lomphakathi wakule indawo ngenhloso yokuthola usekelo.

Iqembu lakoGodlwayo leli lenzele idili eMthwakazi Hall ngoMgqibelo lijabulela ukungena kuDivision.

Iqembu leli lenze kuhle kuDivision 2 ngesizini edluleyo nanko phela belihlezi kunombolo yesibili kulogu okuyikho okubavulele ithuba lokungena kuDivision 1.

Ekhuluma lephephandaba likazulu uMnumzana Mkhululi Mthunzi oyisikhulu esiphezulu kuqembu leli uthe umcimbi wangempelaviki uhambe kuhle kakhulu ethi  ubungumcimbi wokuthi iqembu lomphakathi bazane.

“Umsebenzi wangempelaviki uhambe kuhle kakhulu, ubungumcimbi wokwazisa abadlali kumphakathi weFilabusi njengoba sesivela enduneni, umcimbi lo uphinde wasetshenziswa njengendlela yokudinga usizo kulabo abangakwanisa ukusiza njalo asikhethi ukuthi usizo siluthola ngaphi ngaphandle kwelizwe kumbe khonalapha ngoba umsebenzi lo umkhulu,” kuveza uMnu Mthunzi.

Uqhubekele phambili esithi iqembu lakhe alilawo amabizo abadlali bodumo kodwa uyathemba ukuba abadlali bakhe bazayenza loba yini ukukhulisa ibizo leqembu lesigaba sakoGodlwayo.

“Okwakhathesi asilabo abadlali abadumileyo kodwa silabo abadlali eFilabusi abayibo abasiletha kulelizinga likaDivision 1 njalo sizimisele ukusebenza nzima lokwenza loba yini ukukhulisa ibizo leqembu lethu lesigaba sakoGodlwayo okuyikho okuzalwa khona leliqembu leFilabusi United,” kutsho uMthunzi.

Uqhubekele phambili wathi iqembu likhangelwe ukusebenza njengenqola yentuthuko yebhola ngezindlela zokulanda abadlali ezikolo njalo bona njengeqembu okumqoka yikuthi bekhulise ibizo.

“Iqembu likhangelelwe ukusebenza njengenqola yentuthuko emdlalweni webhola lasempilweni zalabo abazinikele ebhoreni ngokulanda abadlali ezikolweni kusukela kwiECD kusiya ema-secondary njalo njengeqembu okumqoka kithi yikuthi njengoba sesikuDivision 1 sikhangelele ukuhlala kuDivision 1 kodwa nxa  ithendele lithe lawela ekhaya siyafuna ukuya ku-PSL,” kuveza uMnu Mthunzi.

Uphethe ngokubonga inhlanganiso labo labosomabhizimusi ababebuyile kudili leqembu lapho bezazisa emphakathini.

“Silokukhulu ukubonga kunhlanganiso yeTriple M, Talen Vision, labaphathi besigabeni ababekhona abenelisa lokusincedisa ngezipho ezifana lamabhibhi, amabhola kanye lezethembiso zemali ezancedisa kusizini ezayo,” kuphetha uMnu Mthunzi.

Share This:

Sponsored Links