uMthunywa
Nkosilathi Sibanda
IQEMBU lenguqu iChicken Inn FC selitshengise ukuba lilothando lokuthuthukisa impilo zabadlali abasakhulayo koBulawayo, nanko liqina ngokusekela isikolo seMtshede Primary School ngokunengi.
Kumalanga adluleyo, iqembu leli lithengele isikolo lesi impahla yokusebenzisa kumdlalo webhola, okube yisitshengiselo sokuthi litshisekela ukuthuthukisa ithalenta lenguqu kubokhekhe.
IChicken Inn isebenzisa inkundla yeMtshede Primary ukulolonga iqembu layo labadlali abasacathula. Impahla le, egoqela i-kit, elotshwe ibizo elithi Chicken Inn, inikezwe ngeviki edluleyo, kumhlangano obuthanise umqeqetshi weChicken Inn uPrince Matore, umqeqetshi wabasakhulayo uCharles Dhliwayo lentatheli zemidlalo.
I-kit le, kubikwa izasetshenziswa kumincintiswano yenguqu ezaqala ngoNhlangula.
Isikolo seMtshede besimelwe nguPeter Mpofu obikele iphephandaba likazulu ukuba isipho se-kit sizaphathisa kabanzi ukukhweza ukuzethemba ebantwaneni.
“Kuhle kakhulu okwenziwe yiChicken Inn. Isipho se-kit le sizakwenza kube lula ukuthi iqembu lethu libukeke emidlalweni. Sesibona ukuthi abantwabethu sebezethemba ngoba sebegqokiswa kuhle,” kutsho uMpofu.
Umqeqetshi wabasakhulayo kuChicken Inn, uDhliwayo, sebezathola ithalenta elilakho ukuncedisa iqembu kwelakusasa.
“Abadlali benguqu balolongwa besebancinyane. Lathi njengeqembu sizathi ukuthapha ithalenta esikolo lesi,” kutsho uDhliwayo.
Ngaphandle kokusekela isikolo seMtshede ngenguqu, iChicken Inn iphinda isekele leqembu lokugijima kulesi sikolo. Ikwenzile lokhu iChicken Inn ngethemu lezemfundo eledluleyo lapho elinikeze abagijimi beMtshede ukudla, ngesikhathi semincintiswano yezikolo eqhutshwa ngaphansi kwenhlanganiso yeNational Association of Primary Heads (Naph).
