uMthunywa
Innocent Kurira
IQEMBU leHighlanders selibike ukuba selivule uhlelo lokwamukela amabizo alabo abafuna ukuthi bavotelwe kukhetho oluzayo.
Uhlelo luvalwa mhlaka 20 kulinyanga, andubana kuvotelwe isikhundla sikamgcinisihlalo, unobhalo lelunga lekomithi. Amalunga oqobo aleliqembu azavota mhlaka 4 Nhlolanja.
Izikhundla lezi okwakhathesi zibanjwe nguJohnfat Sibanda ongumgcinisihlalo, uMorgan Dube ongunobhalo loMgcini Mafu olilunga lekomithi.
Kumbiko ovele kuHighlanders kuliviki, labo abafuna ukuncintisa kukhetho bazabhadala i-US$200.
“Labo abafuna ukuvotelwa kuzamele bathole incwadi zokukhethwa emawofisini ethu aku-50 Robert Mugabe Way, ngembhadalo ye-US$200. Imali le izabiselwa nxa lo ofuna ukuvotelwa angathola amavoti ayisilinganiso samaphesenti alitshumi.
“Ilanga lokwamukela lokhu nguMgqibelo womhlaka 20 Zibandlela ngehola letshumi lambili emini. Imbadalo yencwadi ingenziwa emawofisini kumbe ebhanga,” kutsho umbiko lo.
Asebephumele egcekeni okwakhathesi, bebika ngokufuna isikhundla sikamgcinisihlalo nguKenneth Mhlophe, Edson Dube, uNodumo Nyathi loQhubani Moyo.
UMhlophe wake waba ngumgcinisihlalo weqembu.
Kusihlalo sikanobhala kuloNsikelelo Mafa Moyo oligqwetha koBulawayo. Kusikhundla selunga lekomithi kuloBheka Sibanda loKindman Ndlovu.
Andubana kuqhutshwe uhlelo lwamavoti la, amalunga eBosso asemthethweni azaqala ngokwenza umhlangano womnyaka, owe-AGM mhlaka 28 Zibandlela.
Okuzaphathwa kulumhlangano kugoqela ukubalwa kwalokho okwavunyelwana ngomhlangano odluleyo, umbiko kamgcinisihlalo, umbiko kamgciningcebo, ukwamukelwa kombiko webhodi, ukuhlohlwa kwesisekelo sombuso lokwethulwa kwamalunga equla lamagqwetha ethimu.
Amalunga eHighlanders azaphiwa ithuba lokwethula izikhalazo, imibono lokunye.
