uMthunywa
Nkosilathi Sibanda
IQEMBU leBosso lingaxotshwa kuligi ka-Division One nanko lakhathesi, ngemva kwemidlalo emihlanu kubikwa lisehluleka ukuqedisa imali yokubhadala ukudlala kuligi le.
Inhlanganiso yeZifa kulumhlubulo welizwe ibika ngokudabuka kwenhliziyo ukuba iBosso 90 izaphuma kuDivision One ingekela ukubhadala mhlaka 23 Nkwenkwezi ngeviki ezayo.
Ithimu le ingenye yamaqembu alokhe esadalala ukukhipha imali eyeneleyo yokuqinisa ukuzimisela kwayo ukuncintisa.
Indleko yokudlala ku-Division One lonyaka yi$2 500.
Isikhulumi sekhomithi yeZifa ekumhlubulo ongezansi uMehluli Thebe uthe ngaphandle kweBosso 90, amanye amaqembu angelamali yiMoto Moto, Toronto leAjax Hot Spurs.
“IBosso 90 yacela ukuthi ibhadale kancane kancane kuze kufike ekupheleni kwenyanga edluleyo. Asikaboni lutho.
“Sibanikeze isikhathi eside, sabekezela kodwa ngemva kwemidlalo emihlanu, akula iqembu elikhiphe imali,” kutsho uThebe egcizelela lokuthi amaqembu eMoto Moto leAjax Hot Spurs lawo akusimo esifanayo.
Isikhulumi seZifa lesi sithe amaqembu anjengeBosso 90 engehluleka ukugcwalisisa isithembiso azakhitshwa.
“Wonke amaqembu la siwatshele ukuthi kuzamele abhadale umhlaka 23 kulinyaka engakafiki .
“Nxa kungehlula, asila elinye inyathelo ngaphandle kokuthi siwaxotshe.”
Kusenjalo, isimo somkhonomi welizwe sihlasele nzima iqembu leNengasha eliphuma eHwange eselixotshwe kunguqu ngenxa yokungabhadali.
“Sesithumele incwadi sibikela iNengasha FC ukuthi isixotshiwe kuligi yethu,” kutsho uThebe.
Impumela yemidlalo:
-Talen Vision 3-1 Toronto
-Arenel Movers 1-3 Bosso 90
-Binga Pirates 0-1 Makomo
-Ajax Hotspurs 0-2 CIWU
-Mainline 1-1 Bulawayo City
-Moto Moto (Bye)
-ZPC Hwange 0-0 Indlovu Iyanyathela
-Mosi Rovers 0-0 Casmyn.
