uMthunywa
YiNtatheli kaMthunywa
ABANTWANA abalethelanta lokudlala inguqu esabelweni seMatabeleland North sebezathapha ulwazi olujulileyo ngalumdlalo kulandela ukusungulwa kwePonel Youth Soccer Academy.
IPonel Youth Soccer Academy esesigabeni seDete, kubikwa ivulwe ngoba sekubonakale ukuthi indawo ezifana leDete, iHwange leBinga zisilela amakolitshi ezemidlalo loba nje egcwele ithalenta.
Ambalwa njalo amaqembu enguqu alodumo aphuma kulezo ndawo.
Umqondisi wePonel Youth Soccer Academy uNelson Ndeka utshele uMthunywa ngoMvulo ukuthi isizatho esimqoka ngekolitshi labo yikunikeza abantwana ithuba.
“Ngokuvula iPonel Youth Soccer Academy sivulela abantwana amasango entuthuko. Ithalenta kumele lilolwe, lilolongwe futhi kulumdlalo.
“Ngokunjalo, sananzelela ukuthi lapha eDete, layo yonke iMatabeleland North, azikho izikolo zenguqu. IPonel Youth Soccer Academy izakuba yinsika kumpumelelo yenguqu,” kutsho uNdeka.
Uthe ikolotshi leli lizayamukela bonke abantwana ngoba lizabe litshiphile.
“Inhloso angithi yikuphathisa umphakathi lesizwe kwezemidlalo. Ukuze inguqu ikhule, lomphakathi lapho okuphuma abadlali kumele kuphakame.”
UNdeka uthe bathola inkuthazo kuqembu leBulawayo Chiefs.
“Indlela iBulawayo Chiefs eqhuba ngayo inhlelo zayo kusikhuthaze ukuthi senze ngokufanayo.”
IPonel Youth Soccer Academy ihlele ukuthi ivule isitolo sayo sempahla yebhola, yakhe inkundla zokulolonga lokuba lesakhiwo sabadlali.
Kusenjalo umphakathi weDete uncome umsebenzi kaNdeka labanye bakhe.
“Nxa abantwabethu bengathola usizo olunje, lathi sizaphathisa. Ligcwele ithalenta ebantwaneni bethu,” kutsho uMlindeli Moyo oyisakhamuzi seDete.
UMlondolozi Ncube ongumbalisi kwesinye isikolo kulindawo uthe iPonel Youth Soccer Academy uzakuba yisibusiso kunguqu yezikolo.
“Mina ngingumbalisi ophinda abengumqeqetshi. Ngibona ikolitshi leli liyingqubekela phambili esigabeni sethu, ikakhulu kuzikolo ezidlala inguqu.”
