uMthunywa
Nkosilathi Sibanda
UMDLALO wokugijima ezikolo kumele kube yiwo ozakwakha ithalenta lakusasa kodwa ababalisi bakhalaza ngokuthi zikhona izikolo eziqina ngokuqila emincintiswaneni.
Kubikwa abaphathi bezikolo kunhlanganiso yabo ebona ngezokuqhutshwa kwemidlalo eyeNational Association of Secondary Heads (Nash) ibika ukuba lonyaka isibophe imithetho emitsha ezajezisa ababalisi abazaqila kumincintiswano yokugijima eqalisa kulithimu.
Ngeviki edluleyo kulababalisi abazingcitshi (amabizo silawo) abalobe incwadi kunhlanganiso yeNash bekhonona ngokwanda kwabaqeqetshi abagijimisa abantwana abaphezulu kweminyaka yokuzalwa edingwa yimincintiswano ethile.
“Incwadi le ibika ngesikhalazo sethu ngokuqila okwenziwa ngezinye izikolo nxa singena kumincintiswano yenguqu lokugijima. Sicela inhlanganiso ehloniphekayo eyeNash, ilungisise loludaba ngoba lokhu sekwenze ukuthi isizwe silahlekelwe lithalenta elifanele liyencintisa kwamanye amazwe.
“Thina singababalisi abafuna ukwakha ithalenta eliyilo hatshi ukuqala. Uthando lwemali yilo oluzabulala imisebenzi yethu yokuphakamisa iziphiwo zabantwana. Nxa kusenza akufakwe isijeziso esiphezulu. Nxa kulesikolo esibanjwa siqila, akubotshwe umbalisi kanye lomzali ovumele ukuthi umntanakhe asetshenziswe ngendlela engayisiyo . . . ,” kutsho okumunyethwe yincwadi yababalisi abesabe ukuziqamba kuphephandaba.
Isikhulu seNash uJohnson Madhuku uvumile ukuthi incwadi le uyibonile.
Ephendula imbuzo kaMthunywa uMadhuku uthe: “Loba siqhubeka ngomsebenzi wokuthuthukisa ithalenta labantwana kumidlalo le, kumele konke okwenziwa ngababalisi kube lobutsha kumbe inguquko phakathi.
“Sithanda ukweluleka abaqeqetshi bezikolo kanye labazali ukuthi benqabele ukuqila osekubhahile kwezemidlalo ezikolo. Kulababalisi abayehlisa iminyaka yabadlali babo ngoba behlose ukunqoba.”
UMadhuku uthe inhlanganiso yabo isithwele nzima ngokucwayisisa amacala ababalisi abephula imithetho.
“Kwesinye isikhathi kulabanye abalesibindi sokukhetha kuqembu lenguqu ulova owake wahlupha kunguqu esafunda.
“Isikolo sinye ngasinye siyisiqalo sokubonakala kweziphiwo zabantwana kwezemidlalo, ngakho ukuqila ngeminyaka yabantwana yikuqila ikusasa yabo,” kutsho uMadhuku.
UShadreck Mlauzi umqeqetshi weqembu leIn-line Academy uthe ukuqila ezikolo sekulimaze ikusasa lenengi yabadlali.
Uthe ukuqila okugcwele ezikolo sekuvalele abantwana abanengi ithuba lokuthi baqhubekele phambili ngemva kokuqeda izifundo.
