uMthunywa
INHLANGANISO ephethe umdlalo wokugijima kuleli iNational Athletics Association of Zimbabwe (Naaz) isikhethe uTendai Tagara ukuthi ayiphathe njalo engumongameli wayo okweminyaka elandelayo.
UTagara wabangumongameli we-Naaz kusukela ngo2012 njalo wakhethwa ukuthi abelilunga lenkokheli zenhlanganiso yeWorld Athletics Development Commission ngoNkwenkwezi.
Ukuvotelwa kwakhe esikhundleni esiphezulu lesi kwenzakale ngesikhathi umdlalo wokugijima usalinde ukuthi uvunyelwe ukuqhubeka ngemva kokumiswa ngenxa yeCovid-19.
Ekhuluma loMthunywa ngoLwesithathu ekuseni, uTagara uthe uzaqina ngokukhuthaza inhlanganiso ukuthi ilolonge abagijimi abazenelisa ukuncintisa kuyo yonke imijaho yaphezulu.
“Lesi yisikhathi sokuthi siphakamise isizwe ngokulolonga abadlali abazi ukuncintisa yonke indawo,” kutsho uTagara.
UTagara wake waqeqetsha iqembu lesizwe njalo uthole inhlonipho ngokwenelisa ukubambanisa inhlelo zomdlalo wokugijima kuleli.
Uthe loba umdlalo wabo ubuvinjwe yi-lockdown yeCoronavirus, ulethemba lokuthi imncintiswano izaqoqwa.
“Umdlalo wethu uzafika lapho esifuna ukuthi isizwe sibekhona kuyo yonke imncintiswano.”
Imjaho eminengi lonyaka ibisebenzisa uhlobo lokuncintisa olubizwa ngokuthi yi-Virtual althletics.
Kusenjalo, umdlalo wokugijima edolobheni leBeitbridge uyaphambili nanko phela ekupheleni kwalinyanga kuzancintiswa ku-Beitbridge Mayor’s Half Marathon.
Abaqoqi balumjaho babike ukuba sekuvunyelwa ukubhalisa ukuphatheka emncintiswaneni lo.
Umjaho usuqoqwa okweminyaka emihlanu yikhansili yeBeitbrigde njalo wasungulwa ngenhloso yokukhuthaza abahlali bakulelidolobho ngokuqakatheka kokuhlanzeka.
Isiphathamandla kukhansili yeBeitbridge njalo engomunye wabaqondisi bomjaho, uLoud Ramakgapola uthe lonyaka kuzancintiswana ngokufanayo kukhankaselwa ukuhlanzeka.
“Ususondele umjaho wethu lapho esikhuthaza khona umphakathi ohlala eBeitbridge, izethekeli labadlulayo ukuthi baqakathekise ukugcina indawo yethu ihlanzekile,” kutsho uRamakgapola.
Umjaho lo unxusa abagijima i25KM lomango ongakhilomitha angu-15 le5KM.