uMthunywa
YiNtatheli kaMthunywa
ABADLALI be-galufu kuleli abadibene enkundleni yeHwange Golf Club sebephiwe umthwalo wokuthi lonyaka bancintisele ukuhlanganisa imali efika i$30 000 kukhunjulwa ingozi yomgodi weKamandama.
Ukuncintisa kwabadlali lokhu kungeyinye yemikhosi ezaqhutshwa kusikhumbuzo selanga lapho okwafa izimbamgodi ezingu-427 mhlaka 6 kuNhlangula ngomnyaka ka1972.
Ngokutsho kwabaqoqi balumncintiswano, kuzancintisa abedlula ikhulu. Inkampani yeHwange Colliery ibike ukuba loba isebunzimeni, ayisoke ikhohlwe ukukhumbula izisebenzi zayo.
Inkokheli zomdlalo wegalufu edolobheni leHwange zibikele iphephandaba likazulu ukuba umncintiswano wabo unxuse abadlali abakubanga le-ProAm kubangwa imivuzo etshiyeneyo egcekeni lomdlalo lo.
Kumbiko ophume enkundleni yeHwange Golf Club, kubikwa abadlali abazaphatheka lonyaka bazatshelwa ukuthi baqinise izandla baphathise kusikhumbuzo.
“Kungumbono wethu ukuthi sonke esizadlala kuKamandama Memorial Golf Tournament sidlale ngendlela ezangenisa imali kusikhwama sesikhumbuzo sengozi le. Njengeqembu le-golf eHwange samukela wonke umdlali, umbukeli lezinye izethekeli kulumkhosi oqakatheke kakhulu.”
Kusukela uqala ukudlalwa, umncintiswano ubusekelwa ngamankampani amanengi, ikakhulu lawo asebenzelana lezimbamgodi zeHwange Colliery.
Omunye wabadlali abakhangelelwe ukuthi bayibambe intambo kulumncintiswano uShelly Gwanonga uthe loba ezadlala efuna ukudla abanye bakhe, athole isicoco, inhloso yakhe ngeyokukhumbula abafela emgodini weKamandama.
“Okuqakathekileyo yikudlalela abantu bakithi abafa kabuhlungu kulingozi. Ngizafisa ukuthi nginqobele bona.”
