uMthunywa
YiNtatheli kaMthunywa
UKAPUTENI weqembu leHighlanders uHonest Moyo usenkingeni!
Lumdlali akasoke alugxobe enkundleni kumdlalo weviki letshumi lambili ngoba ubanjwe kulabo abehluleka ukubamba umthetho womdlalo. UMoyo wetheswe icala lokutshaphaza umdlalo webhola lenyawo ngokunikezwa amakhasi alithanga amathathu imidlalo ilandelana.
UMoyo ubengukaputeni wakuqala kuBosso ukumiswa umdlalo kuhlandla lakuqala kuligi yeCastle Lager.
Ukumiswa kwakhe sekuletha inkinga eziyinqwaba kumqeqetshi uMadinda Ndlovu osekhalaze ngokulimala kwabadlali bakhe.
IHighlanders ilabadlali abalimeleyo ababalisa uNigel Mukumbe, uBukhosi Sibanda loGabriel Nyoni.
Ukumiswa umdlalo kukaHonest Moyo kutsho ukuba uMadinda kuzamele ayiqoqe kakutsha ithimu yakhe.
UMadinda ngeviki edluleyo ubeke umbiko wokuthi kuyisifiso sakhe ukuba abadlali bakhe baphakame kusigaba se-ECD bafunde ukudlala njengamadoda.
“Umuntu kumele akhule, ngakho ngithi kubadlali bami labo abakhule basuke kusibanga seECD baye phambili,” kutsho uMadinda.
Ngaphandle kukaMoyo, iPSL imise abanye abadlali abane; uGeorge Majika oweChicken Inn, Shadreck Nyahwa (Bulawayo Chiefs), Kudakwashe Musharu (Harare City) loMilton Makopa (Yadah).
Inhlanganiso yePremier Soccer League ikhuthaze abadlali ukuthi balandele izimiso lemithetho yomdlalo.
Ekhuluma lephaphandaba likazulu ngoMvulo uKudzai Bare isikhulumi uthe abadlali laba abavunyelwa enkundleni yomdlalo.
