uMthunywa
Indikimba — Ezenkolo
Imbongi nguJerome R Nyathi
Isihloko senkondlo — Bathi ngamadlozi
Abalandeli balamakhasi bazakhumbula ukuthi sike sayithinta linkondlo ngensuku ezedlulayo kodwa kasizange siyiphutshise. Imbongi lapha iyakhala ngamadlozi abanye bethi ngabaphansi. Ngokulandisa kwembongi inkolelo yamadlozi le yenze impilo yabo yabanzima.
Imbongi ithi bebehlezi bebala ngabantu abafileyo lamandla abawaphiweyo. Besenzenjalo imbongi ithi bamangele babuya babayiziwula, izithutha. Bazizwe belokuthuthumela, babuya baba lokwesaba, umzimba lawo waluma kambe bezwe izinto ezitshwaqisa umzimba.
Lokho abakuzwileyo ngamadlozi lawo kubazwise umoya oqandayo khona kutshisa kakhulu ilanga likhupha inhlanzi emanzini. Lokhu kwenziwa yikuthi bazelwa yikwesaba lokwethuka khona kusemini.
Inwele ziyasukuma ngokwesaba. Imbongi igcizelela lokhu ngokusebenzisa isenzukuthi esithi inwele ziyasukuma zime zithi mpo. Kunjalo kumuntu olokwesaba ozwakala ethi ngithe ngidlula laphaya ngezwa inwele zami zisukuma. Imbongi ithi ozelwe izolo ubambe lapha lalapha.
Iyaqhubeka imbongi ithi lowo ozelwe izolo ukhalakhale, wakhalakhala bathi ulamadlozi labo abebemkhangele. Umfowabo wembongi ukhale ngekhanda ukuthi libuhlungu bathi ulabaphansi.
Imbongi kayikuthakazeleli lokhu osekusenzakala ukuthi konke sokungamadlozi. Imbongi ithi icine yathi mhlawumbe umhlaba usubuswa yiwo amadlozi. Bonke abantu abagulayo kuthiwa babuya sebevusiwe. Bonke abantu abaswela umsebenzi baduduzwa ngikuvuswa.
Ukuvuswa kwamadlozi lokhu yikuthi lowo muntu ogulayo uyahanjiswa enyangeni esikhundleni sokuthi elatshwe yena kuthiwa uyagidiswa ehlatshelelwa izingoma zamadlozi lizilelwe lelo dlozi.
Seliphumile lelo dlozi kuthiwa liyakhungwa abuyele kwabo kuthiwa usevusiwe laye usengelapha. Okutshengisa ukuthi imbongi kayikukholwa lokhu yikuthi ithi: “Hawu, thina size ukuzovuswa, ukwelatshwa, lob’ukuziding’ulwazi?” Obuza imibuzo enjengawonalo kuthiwa uthukile, ngakho-le ubefanel’ ukujeziswa kabuhlungu.” Kodwa imbongi ikutshaya indiva lokho ithi, “Sengimelele lokho kujeziswa ngife ngiphumule”.
Imbongi ifuna ukufa iphumule kulokuphila ngentando yamadlozi. Iyabuza imbongi: “Bantu, lawo madlozi asivelelaphi thina.” Kawathakazeleli amadlozi imbongi uba ithi, “Yek’umhlab’ ubumuhle kangaka/Kuthiwani pho njengoba abantu bonke sebesenz’intando yawo?” Iyaphambili imbongi ibuza umbuzo otshengisa owokuwacunukela amadlozi yikho ibuza umbuzo othi: Wona ayengakhululekanga yini esesemhlabeni?”
Iyaqhubeka imbongi ithi ibeyisithutha yavuma idlozi ingazi phela yayisithi ifuna ukuphila. Iyalibuza idlozi ukuthi kambe lona laliledlozi yini lisaphila? Iyakholwa imbongi ukuthi lake laphila idlozi.
