uMthunywa
Indikimba – Ezomanyano
Imbongi nguArtwell T Masuku
Isihloko senkondlo – Siyabonga iUnity bakhokheli
LAMHLANJE lokhe sihamba ngomthambo munye wezinkondlo zona ezidumisa ngokumanyana kumbe sithi ukubambana kwesizwe seZimbabwe. Ukubambana lokhu okwakhethwa ngamaqembu amakhulu alwela inkululeko yelizwe lakithi leZimbabwe kudunyiswa yimuli phose yonke yeZimbabwe. Yikho nje sibona imbongi ezinengi zilobe inkondlo ezikuncomayo zikudumisa lokho kumanyana. Nanzelelani bafundi ukuthi sesixoxe ngazo ezimbalwa njalo lokhe zinengi ezikhuluma ngento efananayo.
Imbongi esiyikhethileyo lamuhla uMasuku laye uyakudumisa lokhu kubambana kumbe ukumanyana. Lokhu kuhle kuvele kusihloko senkondlo yakhe esibethwe ngaphezulu. Njengabo bonke abantu nxa bebonga ulutho olukhulu bathi abalazo izinkulungwane zokubonga. Abanye baze bathi baswela imilomo ezinkulungwane zokudumisa uMdali wabo uSomandla. Ngokujabulela lokhu kubambana okukhona ebantwini imbongi isibuza abakhokheli babo ukuthi pho babongwe ngani njengoba bengelazo izinkulungwane zokubonga?
Zinengi indlela zokubonga ezipha kubakhokheli njengalapha isithi: “Siphe sipho bani? Sicule maculo bani?” Lezi ngezinye indlela abangadumisa abakhokheli abanjengo Cde Mugabe ongomunye walabo abavumelana isivumelwano sokubambana lo Cde Joshua Nkomo. Imbongi ithi bayisizwe bona ngokwabo laba bakhokheli. Abeseqondisa indumiso yakhe kuCde Mugabe athi uyiNkosi yena hlobo lwakhe abuye abuze njalo ukuthi engabe ufuze ukhokho na? Kumbe kungabe yisipho sakhe na?
Imbongi iqhubekela phambili ithi bayamhlonipha uCde Mugabe njalo bayabonga. Utshela uMugabe ukuthi isizwe sakhe siyabonga. Nxa abantu besamangele ukuthi kanti imbongi ikhuluma ngomanyano ibisiqina kuMugabe yedwa njani yona ibisingenisa okaNkomo, uJoshua Mqabuko Nyongolo Nkomo ithi: “ Siyajabula sona isizwe sakho kaNkomo.” Iyaphambili imbongi ithi ayaqolotsha amankonyane. Yikubonga ngapha langapha. Yimihlangano yenjabulo isizwe sonke.
Ibuya njalo imbongi igxile ngakuMugabe ibuza ithi: “Kambe sihloniphe ngani Mugabe/ Sikuphe yona eyethu imizimba /Oh – waze wajabulisa isizwe sakho/Kwajabula iShona, iNdebele, iKalanga, iTonga. Iyagcizelela imbongi ithi ngalokhu itsho imihlobo yesizwe sakhe lowo mkhokheli. Iyagcizelela ukubonga imbongi ithi: “Siyabonga, siyabonga, wensizwa yomuntu. Kwalilanga elikhulu lelo. Kwabalokujabula okukhulu mhla walelo langa lokulobelana phansi isivumelwano sokubambana elizweni lakithi leZimbabwe.
Ngokutsho kwembongo lesisehlakao saletha ukujabula okukhulu elizweni kwaze kwajabula yena uMdali wento zonke uMvelingqangi phela. Kwachelesa lamaqhawe lawo alele emaguswini, bona abafela uzikhulule, impi yenkululeko.
