uMthunywa
Indikimba – Ezomanyano
Imbongi nguReverend Gilbert B Tshabalala
Isihliko senkondlo – Nanku esasikulindele
Le ngenye yezimbongi eziphathelene lembali yelizwe lethu leZimbabwe. Siyakhumbula ukuthi uzibuse welizwe lakithi leli uze ngemva kwempi eyayitshisa okwamagama. Esetholakele uZibuse kubekhona ukungahlaliseki elizweni esikuthinte kwenye inkondlo kunsuku ezisanda kwedlula. Kangisoze ngabuyela emuva ngilandise izizatho zalokho kuxokozela ngoba lapha imbongi iletha indaba emnandi yokubambana kwesizwe seZimbabwe.
Ukhona olobe inkondlo ngaphambili ethi: imoya munye iZimbabwe. Zinengi ezikhuluma ngodaba olufanayo ngaphansi kwendikimba yinye esingakazihlaziyi.
Imbongi engiyikhethe lamhla ithi “Nanku esasikulindele”. Umbuzo okhona ngothi: “Yini lokho ebesikulindele?” Lokho obekulindelwe yisizwe ngamehlo abomvu yisivumelwano sokubambana kwesizwe seZimbabwe. Iyasivezela imbongi ukuthi leso sivumelwno salotshwa mhla zimatshumi mabili lambili kuye kanye uMpalakazi.
Isivumelwano leso salotshwa emini ilanga ligwaze umhlaba kuso isigodlo iHarare. Siqakatheke kakhulu leso sivumelwano ngoba salotshwa ngensiba zegolide. Sekwenzakele lokho imbongi ithi yahlokoma impumalanga, yavuma intshonalanga. Lokhu kuveza ukuthi lesi sehlakalo semukelwa yilizwe lonke. Ababekhangelelana phansi beseyisana baguqula ukwenza kwabo bagonana, bangana baxhawulana betshengisa ukujabulelana.
Imbongi iyaphambili isitshela lokho okwenzakala mhlalokho. Ithi kwabhalwa ngamabala amakhulu: “SONKE SINGABANTWANA BENHLABATHI” Nxa kesenzakala into enhle izitha ziyayangeka. Imbongi ithi izitha zabamba ongaphansi okutsho ukuthi izitha zamangala zagcwala inhloni ukuyangeka kwazigcwala. Kuthiwa zawukhamisa zawunkema zibona indlu yeZimbabwe isimile. Lokhu kuveza sobala ukuthi kwakukhona izitha ezazifuna iZimbabwe ihlale ithobelena kungela kuthula.
Iyaqhubeka imbongi ithi amacebo alabo ababefisela iZimbabwe okubo aphangalala njengomqungo eqili. Lokhu kutshengisa sobala ukuthi lawo maqhinga ababe lawo okubona iZimbabwe ilwisana idlephana aphela. Iyasifundisa imbongi ukuthi nxa abantu bengabambananga elizweni kubanjani. Imbongi ithi indlu edabukene phakathi iyantengantenga njengomhlanga. Ngamanye amazwi indlu engabambananga iyaxega njengomhlanga wona ohlala uqhuqha emanzini.
Indlu engabambananga ihuga izitha labathakathi. Ihuga inzondano kunye lokufa. Abantu nxa bengabambananga kuba lokunxaphelana lengxabano isizwe sichelwe ngenyembezi ngoba kuyabe sekulokulwisana kanye lokubulalana.
Sekulokubambana lapha ekhaya imbongi ithi kwaqhamuka izizwe lezizwana zizekwethesa lowo owayengumkhokheli welizwe ngaleso sikhathi uBob (uRobert Gabriel Mugabe) isicoco sokuthwala ubunzima bethu.
Kwenziwa lokhu kuzwelwa izinkedema (intandane) labampofu abayangekileyo. Ukugcwalisa lokhu imbongi ithi bagombothelana bangana uBob loMafukufuku uJoshua Mqabuko Nyongolo Nkomo. Kwemukelwa nguzulu wonke lokho imbongi ibeka ngala amazwi: “Yaduma inkundla kwacitsh’ilanga.”
Yithathele lapha mfundi uyiphutshise inkondlo le.
