uMthunywa
Indikimba — Ezothando
Imbongi nguD E Ndoda
Isihloko senkondlo — Uthando
KUYINI uthando? Ngombono wembongi esingayo lamhlanje uthando luyinotho kazulu, luyinduduzo yentando yothando. Luyinjabulo yothando ukuthanda. Iqhubekela phambili imbongi ichaza uthando njengesipho esingelansumansumane njalo kuyisilinganiso sokupheleleyo lethemba labathembayo bodwa. Ngenxa yokuthi uthando luluthando lwabathandanayo labathandayo imbongi igcizelela ukuthi luyisibekelo sakho konke okuhlazisayo.
Ngamanye amazwi lapho okulothando khona konke okuhlazisayo kuyasibekelwa kufihlwe kungabonakali ebantwini bonke. Lapho olukhona uthando lulolonga konke okudidayo. Akulamazombezombe lapho okukhona uthando ngoba lona lulolonga konke. Lapho oluthe lwazika khona uthando lungumbetheli wesikhonkwane enhliziyweni. Lubotshwa luqine uthando ngenxa yalesi sikhonkwane.
Njengoba uthando luvele luluthando lapho olukhona akulanzondano ngoba imbongi ilubiza ithi: “Mval’amagam’enzondo.” Khangela umuntu nxa ephakathi kothando kavumi kumbe kaboni ukuthi lowo athandana laye mubi, lanxa abanye besithi mubi ukhuza impisi lowo athandana laye. Yena umbona emuhle okweNgilosi lowo athandana laye.
“Batsho mqoth’ukhuz’impisi/Thando Ngilosi phansi kuwo ngawe.” Batsho abanye bathi kabuquthwa kwabo kwesithandwa sayo bethi kabalali kuyathakathwa kodwa ngenxa yothando imbongi ithi: “Batsho mqotho kabuquthwa kwabo/Ngoqutha; abakwabo ngawe thando.” Abanye labo bayatsho ukuthi kasiziphathanga isithandwa sayo libele lendlela besitsho ukuthi ulesikhombekhombe ngunondindwa kodwa imbongi ithi bobandlela nye ngothando. Kavumelani lakho okubi isithandwa sayo esibhixwa ngakho.
Uthando luletha ukuthula ngombono wembongi yikho nje ibuza imbongi isithi: “Kuthula bani ungekho thando? Inhlonipho layo kayikho nxa uthando lungekho. “Nhlonipho bani lungekho thando? Lapho olukhona uthando lemifula oNgwigwisi begcwele bethwele izigodo uyachapha osethandweni. Lapho olukhona uthando othandayo kalandaba ukuthi kuyalanjwa abakwabozala batshaya inja ngekhanda. Ikhanda lalowo othandayo uthi kungangcono bakhandane bonke ngalawo makhanda.
Ngalamazwi utshengisa ukuzimisela lo othandayo ukuthi kungabangcono balambe bonke lanxa kulanjwa kwabozala laye uzimisele ngalokho. Ngenxa yalezi zinto ezenziwa luthando iyabuza imbongi ukuthi lunganani uthando njalo unjani kobathuthelayo? Iqhubekela phambili ukubuza uthando lolu ukuthi kambe lumbala bani njalo ngamehlo anjani alubonayo? Iyiphetha lapha imbongi ngoba iyalubuza uthando ukuthi lusimo bani njengoba lunzima kanje.
Imbongi isivezela ukuba kade abantu bezenza izimanga bethi luthando. Iyabuza-ke imbongi ukuthi kanti lubaphica ngempico bani engalaminyaka? Luleziga uthando ngoba nanko kuthiwa lwethula umfundisi engqondweni yokholo samuntu ebantwini abe ngomunye labo. Lapha uyabe esewile umfundisi engqongweni yokholo okungabe kubangelwe yikuwela esonweni ephambanise okumele kwenziwe ebandleni. Uwiswa kuyini engqongweni yokholo umfundisi?
