uMthunywa
Indikimba — Ezothando
Imbongi nguS M Khumalo
Isihloko senkondlo — Uphawu
KUYINI uphawu? Uphawu lukhomba ukuthi ulutho oluthize ngolukabani. Imbongi iyasichazela ekuqaleni kwenkondlo ukuthi ezifuyweni uphawu lukhomba ubumnini. Abanikazi bezifuyo bahle basike izifuyo zabo zisesencane uphawu ukuze kungabi lokuthandabuza ukuthi umninizo ngubani. Lokhu kwenzelwa ukuthi abantu bahlalisane ngokuthula bengabangisani izifuyo zabo. Lesifuyo esixhwalileyo singaphuma kwezinye singene kumhlambi womunye sinqandwa ngalo uphawu kuthi lalowo obesezama ubusela ethi uMlimu kaphi ezandleni azithole esesedale ethonisiswa ngoba ezama ukweba isifuyo somunye.
Ngenxa yophawu lona olutshengisa ubumnini izingane ziyaqolotsha zizizwe ubunye ngoba zingezosendo lunye. Eyesicebi imfuyo yembeswa ngophawu kuthi eyesichaka laye ongumyanga igutshuzelwa ngalo uphawu kuthi ngenxa yalokhu bafanane. Uphawu lunye lwenza kubelokufanana phakathi kwezinto. Kulomehluko kuzindlela lemikhuba yokholo. Izembatho lemikhuba yikholo, yilo uphawu lwenkolo. Ukuthi uzibani ngowaluphi ukholo kutshengiswa yizembatho lemikhuba khona okuluphawu lwenkolo.
Icawu eladabukana lelinye lalo likhanya kuhle ngenxa yezembatho zalo. Kulula ukwehlukanisa amasonto ngenxa yezembatho zawo kanye lemikhuba yazo. Bazwakala abamabandla atshiyeneyo lowo lalowo ezibula ethi eyakhe inkonzo yiyo kanye eyamiswa nguSomandla ethi kawuboni kanti lezenzo zakhe — kanti lowana laye athi abahlamuki bayaphela du — uphawu oluyilo ngolwakhe. Kujayelekile ukuthi uzwe abamabandla atshiyeneyo esolana abanye bethi elabo ibandla yilo lodwa eloqobo.
Lalabo abendileyo abathole inkonzo kwenye indawo luba yisibonelo uphawu oluyindandatho. Lutshengisa ubugugu balowo ozuze inkonzo. Lanxa ecabuzela emendweni wakhe uzizwa ukuthi uphelele uyingwabungwabu ngempela. Kuthi lalabo abalembono emfitshane, oMbon’omfitshane bankeme — bathi uMaNxasane uzibuka ngani? Batsho njalo nje ngoba iminwe yakhe ize ayilandandatho yona etshengisa ukuthi utshadile.
“Iminwe yakhe ize nje — engela ngitsho leyomtshado? Angagcwala njani kuleso sikhundla engela phawu na?” Kusobala ukuthi indandatho layo iluphawu olutshengisa ukuthi lowo olayo laye usekhonze emzini othile njalo imenza abeyingwabungwabu ngempela. Abathanda ukukhuluma, ONkulum’azikude bahle bafunge bagomele bathi omunwe ze laba abangalandandatho abatshengisa ukuthi bendile kuthiwa yizichaka — akubona ontandose.
Ontandose ngomama abathandwa kakhulu lapho abendele khona kuthi labo abangathandwayo kuthiwa yizichaka zona ezisetshenziswayo kuphela zingatshengiswa uthando olugcweleyo. Kodwa incwadi engcwele isikhumbuza ngalowo owezwa abakaYisaka ankeme ebabaza ukuthi uphawu lungaphandle nje kuphela kanti isibopho lesinqumo kusembilini kuphela. Ingaphandle iyakhohlisa kanti okungaphakathi embilini yikho okutshengisa iqiniso lomuntu ukuthi yena unjani.
