uMthunywa
Indikimba — Inkondlo ezisolayo
Imbongi nguDoris Dube
Isihloko senkondlo — Impisi zakoCele
AKUMANGALISI ukuthi inkondlo esiyihlaziya lamuhla ingaphansi kwendikimba ethi, Ezisolayo. Umama okhuluma lapha uphakathi kosizi emva kokuba esetshiywe ngumkakhe uCele.
Sezimhlupha lumama ongumfelwakazi izihlobo zikaCele. Isimanga yikuthi ezinye izihlobo zakhona zingomama, okumele ukuthi aluba zizwela omunye umama.
Kodwa ngenxa yokuthi zingomabuya ekwendeni zifuna laye lumama athwale nzima kukanti yena ubetshiywe nguCele ephakathi komhlane lembeleko.
Uyatsho lumama ukuthi wayekhulumile kuCele ukuthi kalungisele abantwana babo esaphila ngoba impilo yalamuhla kayaziwa.
Kusobala ukuthi lumama wayekubona ukuthi uCele nxa esifa etshiya engalungisanga ukuthi ilifa lakhe labiwe njani engafa izihlobo zakhe zizabuya zizothatha lokho okumele kube ngokwabantwabakhe.
Umama lo uchaza abafowabo bakaCele njengempisi eziphangayo. Impisi zingathola ukudla zihle zikuphange zikudle zikuqede ngesikhekhekhe ngoba zisesaba ukwemukwa ngezinye inyamazana ezinkulu kulazo.
Labafowabo bakaCele yilabo abaphanga ukwaba ilifa likaCele ngokuphangisa okungekho emthethweni ngoba vele kungesilabo. Kungenzeka njalo ukuthi bamiswe nxa bengaphuza.
Okubuhlungu kakhulu kulo umama yikuthi wathi ezama ukuxwayisa uCele yena wala ngokuthi uyazi yena uyindoda.
UCele wathi umama lo wesaba umnyama ongelampisi esitsho ukuthi akulanto enjalo eyayizakwenzeka ngakho-ke umkakhe kwakungamelanga esabe ngoba kusazi yena.
Ubuhlungu lumama ngoCele aze abuze kosefile athi: “Kuyini-ke lokh’angitshiye kukho lempisi zakwabo lezi?” Yizihwaba izihlobo zikaCele lezi umama lo asekhala ngokuthi utshiywe phakathi kwazo.
Kuthiwa abafowabo bakaCele lapha okuthiwa zimpisi kuthiwa zaqala khona mhla wemfa engakapholi lakuphola uCele.
Zahle zabuza ibhuku lebhanga izihlobo zikaCele. Zibuza ibhuku lebhanga zizonde zifile zisithi umfowabo ziyamazi ubesebenza, eyindoda esuthayo kungenzeka njani ukuthi indoda enjengaye elendlu enkulu njengaleyo ibe lokuyimadlana ebhanga.
Zafunga zathi umkakhe ulamanga wenzela ukusala efukutha (esidla) imali yomfowabo, eyidla lamanye amadoda. Uqhubekela phambili umkaCele ethi impisi zakoCele, (abafowabo) phela, zeza emakhethenini zawadonsela phansi.
Njengoba emakhulu lawo makhetheni umama lo usebenzisa isenzukuthi esifaneleyo esithi, “Zawawohlozela phansi wonke.”
Sekunjalo zawabuthelela aba yinqumbikazi laphaya. Umama lo uthi wayibukela phansi leyonqumbikazi ngoba emboze inyembezi zosizi.
Wayesasephakathi kosizi olukhulu engeke wabuza ukuthi kwenzakalani. Uyaphambili umama lo ethi mhlawumbe benza umkhuba njengoba wayebone ekhitshwa nxa kubikwa imfa.
Kodwa uthi awakhe lawo makhetheni wawabona lapho wahle wawacina.
Wezwa sekuthiwa asebe yizo inyembezi, izinyembezi zempisikazi zakoCele lezi, amabuya’ekwendeni ehluleke ukuvuthisa awaw’amaseko.
