uMthunywa
Indikimba – Ezomanyano
Imbongi nguJ J Ndlovu
Isihloko senkondlo – Imoyamunye iZimbabwe
Isihloko lesi sitsho ukuthi isizwe seZimbabwe sibambene. Nxa kuthiwa imoyamunye iZimbabwe kutsho ukuthi abantu bakhona babambene, bahlangene bacabanga okufananayo. Baphilisana ngokuthula kungela kulwisana ngemihlobo etshiyeneyo. Ukubambana kwabantu beZimbabwe kwaqeda konke ukungahlalisani kuhle. Ngalokho-ke imbongi ithi: “Imoyamunye iZimbabwe”.
Indikimba okutholakala khona inkondlo le ithi: “Ezomanyano”. Kayiphambanisi imbongi ngalokhu igcizelela njalo idumisa abantu beZimbabwe ngokubambana kwabo ngaphansi kwamabandla amabili ayiwo alwela njalo abisa uzibuse kuleli. Kuvela sobala umbono wembongi ngokubambana lokhu lapha ehle iqale ngokudumisa wona maqhawe ayiwo aletha lokho kubambana abantu bemoya munye.
Zwana la amazwi embongi ekuqaleni kwenkondlo yayo: “Sithi halala kulawo maqhawekazi/Okunamhlanje sihlezi santandokazi/Ngalw’igazi elaphalazwa sambobe wolaza olahlwe akwandaba ngob’uyize/Sithi bayethe kulawo madlozikazi eZimbabwe/Okulamhlanje asilondolozile kabanzi eZimbabwe”.
Nxa sihlolisisa lesi sicaphuno ivela sobala indumiso imbongi eyipha amaqhawe lamaqhawekazi. Iyawadumisa amaqhawe lamaqhawekazi iwethulela isigqoko (ingowane) ithi lamhlanje sihlezi santadokazi. Imbongi isebenzisa lesi sifaniso itshengisa ukuthi lamhlanje sihlezi kuhle lapha eZimbabwe njengentandokazi. Siyayazi intandokazi ukuthi ngumfazi wokucina esithenjini onguye othandwa kakhulu ngumyeni wakhe.
Kodwa lapha imbongi ifakaza ukuthi ngenxa yamaqhawe lamaqhawekazi lmhlanje sihlezi kuhle njengayo intandokazi. Ukuze abantu okugoqela mina lawe ukuze sihlale kuhle imbongi ithi kungenxa yegazi lamaqhawe lamaqhawekazi elachithekayo (elaphalazwayo) sambobe wolaza wona olahlwe akwandaba zalutho ngiba uyize. Iyawabonga njalo amadlozi amakhulu aweZimbabwe okulamhlanje asilondolozile kabanzi.
Ukunanzelela amadlozi kutshengisa ukuthi iyawakhonza amadlozi imbongi ngoba kayikufihli ukuwadumisa amadlozi akibo ngokuba londoloza kubo bonke ubunzima abahlangana labo empilweni zabo.
Iyaqhubeka imbongi iveza izinto ezithile ezazisenzakala ebantwini kungela manyano. Ithi: “Akusithi laba ababetshaywa kabuhlungu? Akusithi laba ababetshelwa ubukhefa? Akusithi laba ebesiyimihambuma eZimbabwe? Akusithi laba ebesisemukwa imihlaba yethu? Nxa sihlolisisa la amazwi kuyasitshengisa obala lapha isizwe seZimbabwe esivela khona.
Iyasitshengisa imbongi ukuthi babetshaywa kabuhlungu abantu. Amabhunu lawo esabusa ayetshela abantu ubukhefa ibala eliyinhlamba ebantwini. Iyasikhumbuza njalo imbongi isihluku esasisenziwa ebantwini abaNsundu ngabamhlophe bebemuka imihlaba evundileyo bebasa lapho okwakulugwadule khona lemhlaba elugwadule othi lanxa ulimile ungazuzi lutho emasimini.
