uMthunywa
Isihloko senkondlo – Madlozi akwethu
Kusobala kule inkondlo ukuthi imbongi ikholwa emadlozini abanye bethi ngabaphansi. Imbongi ikhalela emadlozini akwabo ukuthi kayikhuphe ebantwini ababi njalo bayivikele kunswelaboya ezingela nhlonipho. Inswelaboya lezi yizigebengu. Iyaqhubeka imbongi ithi kayikhutshwe phakathi kwababi labo abanhliziyo ezikhumbula ububi lenzondo.
Ababi labo imbongi edinga ukukhutshwa kubo bayilabo inhliziyo zabo ziqophe abangela cala ngabo ngoba bona badinga inzondo kwabangela cala labantu. Iyacela njalo imbongi ukuthi amadlozi akwabo ayikhuphe ebantwini abambaxa mbili njengolimi lwezinyoka zasendle zona ezibulala abantu zingabadli.
Ukuba mbaxa mbili lokhu kungabe kusitsho ukuthi ngabantu abalolimi abaxega abantu.
Babi laba bantu abambaxa mbili, imbongi ize ithi imilomo yabo igcwele ngobuhlungu bebululu. Ye, ubuhlungu benyoka butholakala emlonyeni wayo ngakho-ke banjalo laba bantu. Iyacela imbongi ukuthi amadlozi akibo amvikele kulezinswelaboya izigebenga. Iyacela okungathi iyathandaza imbongi ukuthi amadlozi akwabo ayigcine ingangeni ezandleni zababi.
Iyacela imbongi ukuthi amadlozi akibo ayivikele kulaba abangathandi ukuthula lapha emhlabeni bona abafisela ukumkhubaza kuzo zonke indlela ahamba kuzo. Kubi, lapha ethi ihamba khona imbongi ngoba labo abayizondayo ithi bafakile isifu phambili kwenyawo zayo. Isifu ngesokuthiya inyoni ukuthi egxoba kuso siyayimbokotha ifele khonapho.
Ithiyiwe imbongi ngezinto ezinengi, sesizwile ngesifu, iyaphambili ithi bafakile umambule ezindleleni zayo. Imbule siyakwazi ukuthi ngeyokuthiya izinto ezinjengenhlanzi ukuthi zonke ezingena kuyo azenelisi ukuphuma.
Lokhu kugcizelela ukuthi bayithiya ngendlela ezinengi labo abayizondayo imbongi.
Nxa isiya phambili imbongi iyaveza ukuthi amadlozi akibo ayivikela yaphepha kokubi kwathi labo ababeyifisela okubi babuna okutsho ukuthi badana.
Iyaqhubeka imbongi icela amadlozi akibo ukuthi ayivikele. “Hawu madlozi akwethu vikelani, ngethembe kini baphansi/ Ngiyakhala phambi kwenu zwanini bakwethu/ Lingivikele kulezinswelaboya ezingifisela ukufa lokuhlupheka”.
Oyakugcizelela imbongi ukuthi ithembe kuwo amadlozi akwabo njalo iyawadumisa.
Iyawabonga amadlozi akibo imbongi ngoba ithi ngawo izitha zehlulekile ukuquma elayo ikhanda ngoba alayo imbongi ukuphuma kwamalanga wonke. Iyavuma imbongi ukuthi amandla amadlozi ayayivikela njalo iyawabonga amadlozi akibo.
