uMthunywa
Indikimba — Ezomanyano
Imbongi nguSibangilizwe P Jubane
Isihloko senkondlo — Mkhulu lowo mbiko
SIQHUBEKA ngale inkondlo yethu esiyiqala kuviki ephelileyo emayelana lombiko omkhulu wokumanyana owamenyezelwa kulizwe lakithi leZimbabwe. Wawumkhulu lowo mbiko ngoba wezwakala kuwo wonke amagumbi elizwe. UZulu wonke wahlokoma wasukuma efuna ukuyazizwela lokuzibonela ukulotshelwana kwaleso sivumelwano esaletha ukumanyana kwesizwe.
Imbongi iyakugcizelela lokho ngokuthi mkhulu lowo mbiko. Siphethe lapho imbongi isitshela ukuthi umbiko omkhulu lowo wathi ziphelile lezo nkulumo ngesivumelwano lokubhalelana phansi amagama okufakaza leso sivumelwano. Isivumelwano sokuqeda lonke uhlupho. Uhlupho lokungavumelani lokungathembani. Ukungahlalisani njalonjalo yaze yafika lapho efananisa khona lokhu kungezwani phakathi kwesizwe sabantwana bendlu-nye abebedlephana samanina esithembu.
Kujayelekile ekuhlalisaneni kwabantu ukuthola amanina esithenjini elwisana engahlalisani kuhle. Kwakunjalo lakusizwe sakithi phambi kokuba kulotshwe phansi isivumelwano somanyano. Imbongi iyagcizelela lokho isitshela ukuthi: “Mkhulu lowo mbiko/Owabik’isivumelwano somanyano/Isivumelwano esiyinsika yokubumba isizwe/Isizwe esibambene saqina okwenjanji.” Sagcika asaze satshiya lantutshana”.
Lokhu kufakaza ukuthi isivumelwano sokubambana lesi kwenza isizwe saqina njalo ngokubambana lokhu savalela izitha ngaphandle zona ezazingaletha ukuhlakazeka lengxabano. Ngokubambana lokho isizwe sadla sikhululekile, uluju lezithelo zamandla ezithukuthuku zegazi zalawo maqhawe akhona lalawo asatshonayo adlulayo. Imbongi iyagcizelela ukuthi mkhulu lowo mbiko owabikwa ngalelo langa elikhulu njengamanye amalanga embali yakuleli ahlonitshwa ngezenzo, izehlakalo kanye lezigigaba zawo.
Imbongi iqhubekela phambili iveza ukumangala ukuthi kayazi ukuthi bayothini labo bantu balowo mtshetsha phansi lamandla lesibindi sokwehlukanisa abantwana bendlu sanina elilogwebedla lomlomo, liloya ekwendeni. Imbongi iyasiqakisa leso sivumelwano somanyano yikho nje ithi lalamhlanje kuyancencetha ezindlebeni nxa isizwa ukumemetheka lokujula kwalo umbiko wokumanyana lesandulelo saleso sivumelwano sona esandulela intuthuko lengqubela phambili yaleli lizwe.
Ilizwe elifakaza ubudlova, ubugwelegwele lokulahleka kwamakhulukhulu emiphefumulo lokubhidlika kwenotho lempahla yesizwe, ngokungamanyani. Yizo izinto ezimbi ezazilethwa yikungamanyani. Iyaphinda njalo imbongi isitshela ukuthi mkhulu lowo mbiko, mkhulukazi. Ngenxa yalesi sivumelwano imibankwa ebiyakhele ezinkundleni ithuthile. Ubulembu bonke obebulapho bukhithikile kwathi lendlela ebezimile utshani zingasahanjwa ngoba abantu bengasahambelani sezivuthiwe.
Lapho obekungasahlali khona abantu ngenxa yalesi sivumelwano umuhlwa obulapho ufile wathanyelwa konke lokhu kubangwa nguzulu obetshudula exokozela kulezonzinkundla ukuze ezizwele ngezakhe lowo mbiko ongako wamakhosi, omkhulu osikhumbuza ilanga elikhulu likaZibuse lona elavula amasango amajele amakhulu.
