uMthunywa
Indikimba — Ezempi
Imbongi nguDumisani J Tshuma
Isihloko senkondlo — Engakubonayo
Lalamhlanje silokhu siphethe inkondlo efananayo elesihloko sinye.
Ukuthi ulemizwa bani ngayo mfundi sizakudinga ekupheleni kokulandisa ngodaba lwayo.
Iyaqhubeka imbongi ilandisa ngalokho eyakubona ngesikhathi sempi lapho abantwana benhlabathi bakhetha ukulwisana labamhlophe bona ababebathwalise amagabha avuzayo elizweni lakwabo.
Siyezwa lokuthi ubuntu babantu abaNsundu babusenyanywa ngabamhlophe.
Ngenxa yalokho abantwana benhlabathi baguqa babikela inyoka zesizwe, amadlozi esizwe phela.
Bakhomba phansi bachelachela kwathi lawo amadlozi esizwe abezwa mpela.
Yabakhafula imbiza baphuma, samavimbandlebe ngesikhathi kusina izulu elina lichophelela imvimbi.
Aphuma ngobunengi phansi amavimbandlebe ngaleso sikhathi. Esebazwile amadlozi akwabo abantwana benhlabathi baphuma bakhangela elizweni lakwabo lelo elilenkaba zabo.
Kwakungelula lokho ngoba sebebhekise amabombo elizweni lakwabo babeqanqatha ngeganga beyamisane lezilwane. Baphuma emilonyeni yazo okutsho ukuthi zazifuna ukubadla.
Imbongi iyakubabaza okwenzakala ngemva kwalokho ikuveza ngesibabazo ithi, “Yamb’indaba madoda!” Iqhubeka isebenzisa isaga ithi yawuchitha umuthi inkonyane! Kwafa gula kwachitheka amasi.” Kwasekuliwa lapho.
Kuchitheka amasi lawo nje echithwa ngumntanenhlabathi, abantu abeNsundu besilwa labamhlophe.
Kwenzakala konke lokhu umntanenhlabathi ubindana labo ubuthakathi babamhlophe ababebacindezele. Kwaliwa imbongi ifakaza lokho ithi, “Yabambana yabhuqana madoda! Kwachitheka igazi lageleza.”
Kwaliwa kakhulu yikho imbongi ikubabaza lokho kulwa.
Ithi balixhapha badela abafana bomkhosi kanti basebegamdele inyongo yeNkosi- Besabeka-ke besithunzi ngaka/Ngoba bekhamfuze mahlwili ngaka.
Imbongi iveza ukuthi abantwana benhlabathi babalesibindi esingaka esokulwisana lesitha ngoba sebexhaphe igazi labafo badla lenyingo okwenza babaliezibindi zokulwisana labamhlophe yikho nje impi eyalandela lapho yamangalisa imbongi.
Besabeka abantwana benhlabathi ngesibindi abasebelaso ngoba imbongi ithi basebekhamfunze amahlwili angaka. Iyaphambili imbongi ichaza ukulwisana okwaba lapho.
Ithi, “Yabhuqana kwathunq’uthuli madoda! Kwaqaqamb’ inkwelo ngapha/Kwagwagwama sigwagwagwa ngale/Kwaquphuka maquphuna lapha.’ Lapha imbongi iveza izikhali ezasetshenziswa ekulwisaneni lokhu.
Kwakukhona izigwagwagwa labo maquphuna. Kwadilika amadoda kwawa ndojelana ekulweni lokho.
Ngenxa yokuchitheka kwegazi lelo kwanuka ukufa kwanuka amagusu kwazekwamangala imikusu izihlahla ezinkulu ezitholakala emaguswini.
Imikusu le kuthiwa yamangala ngoba ibona amaxhaphozi egazi lempi le. Kwaliwa endaweni ezitshiyeneyo njengezintabeni. “Yaqwaqazan’ezintabeni –”
Qaphela ukuthi ubhubhane lweCovid-19 lokhu lusiyaphambili. Zivikele njalo uvikele labanye.
