uMthunywa
Indikimba: ezothando
Imbongi nguSibangilizwe P Jubane
Isihloko senkondlo — Izenzo zothando Thandiwe
KULE inkondlo imbongi itshengisa izenzo zothando.
Uthando olukhulukazi luyamenzisa izimanga umuntu njengalokhu okutshengiswa yimbongi lapha. Lumuntu okukhulunywa ngaye lapha uphakathi kothando olukhulu njalo uthandana lomuntu oyedwa.
Ngumuntu wesilisa lumuntu ngoba isithandwa sakhe igama laso nguThandiwe. UThandiwe libizo labantu besintwana.
Imbongi isitshengisa lumuntu elesifiso esikhulu sothando ekuqaleni.
Lumuntu ufisa olukhulu uthando, athandwe ngayo yonke inhliziyo langazo zonke izenzo zothando. Ufise lokuthi ahambe ngendlela ezimazombombe zothando. Into emazombe ngengaqondanga kodwa ngenxa yothando olukhulu lumuntu uyafisa ukuthi ahambe ngaleyondlela engaqondanga.
Lumuntu ufise ukuthi ehle enyuke, atshone ajule esiya kothandanani. Lokhu kusitshengisa ukuzinikela kothando ukuthi ungenza loba yini nxa uphakathi kothando olukhulu oluzikileyo. Nxa ethi uyakhangela eduze kwakhe ubona kungela muntu omthandayo lapho. Kakho umuntu amthandayo laye lapho ngaphandle kwaso isithandwa sakhe uThandiwe. Yiso isithandwa sakhe abefisa simthande ngenhliziyo yakhe yonke.
Lumuntu okungaba yimbongi iyamthanda uThandiwe ngoba ithi uluthando olunjengo lomthando wona othandela uze uyekele ngokufa kuphela.
Uyasivezela lumuntu ukuthi bahlangana njani lesithandwa sakhe uThandiwe. Uthi wambona eloThandekile emafusini akoZithatheleni. Yikho lapho ezabotshwa khona izibopho zothando. Uyaqhubeka lumuntu ethi uthanda zigcwaliseke izithembiso phela ukuze lawo mafindo othando athandele inhliziyo kaThandiwe ukuze kungabikhona lentutshana engavulela undaba angene.
Kungaba lentutshana phakathi kwamafindo othando kulakho ukungenisa labo abathanda ukuthwala izindaba bahambe beyifafaza igcwale yonke indawo.
Lokhu yikho okubangela ukuthi uthando luchitheke yikho lumuntu efisa ukuthi undaba avalelwe ngaphandle engangeneli kweyababili. Luzikile njalo lujululile loluthando.
Uyasazisa ukuthi: “Makhulu lamaketan’olweth’uthando Ziqinile lezintamb’ezolweth’uthando.”
Uyaqhubeka lumuntu etshengisa ukuqina kwentambo zolwabo uthando. Uthi bazidonsa bobabili lesithandwa sakhe lezontambo zabehlula. Bacela abangane zabehlula, bacela abazali labo behluleka.
Umfundisi laye amehlula ukuwaqamula lawo maketane wothando lwalaba ababili. Esehlulekile umfundisi wathatha ugwalo olungcwele.
Ngalo umfundisi watshumayeza abebandla lezihlobo ezazinxusiwe ukuzadonsa lezozintambo. Lokhu ukukhumbuza isithandwa sakhe uThandiwe.
Uyasitshela lumuntu ophakathi kolukhulu uthando amazi akhulunywa ngumfundisi mhla ebatshadisa.
Uyasitshela ukuthi batshadiswa ngumfundisi uNtando yena: “Wath’okubotshw’emhlabeni, kubotshwe lasezulwini, Yiwo la mazwi kamfundis’uNtando, Enike’ezeth’izintambo ezulwini, Zemukelwa zingilosi zadonsisiswa.”
