uMthunywa
Wayne Ncube
ABADLALI bohlonzi ku- koBulawayo bakhangelele ukuthi balubhekise ezweni leDakar ukuyalwela ukuthola ithuba lokuthi bangene kuma-Olympics.
Lokhu kuza ngemva kokuqoqwa kombukiso womdlalo lo okwakuqala lonyaka owenzelwe enkundleni yebhawa yeMasilela. Inhlanganiso yeBulawayo Boxing Association (BBA) iqhube imidlalo le ilenjongo yokuthi ihlaziye isimo sabadlali anduba kuhanjwe edolobheni leDakar, eSenegal.
Iphephandaba lifike kulezi inkundla ngempelaviki lapho okube lemidlalo yokubhuqana leyi kubuthene amaqembu amane agoqela iNketa, Sikhulile, Lobengula kanye le-Victoria Falls.
Loba abadlali abavela eGwanda laseNkabazwe behluleke ukuza, imidlalo le ayizange imiswe.
Ekhuluma lentatheli uSteven Masiyambumbi owe-Zimbabwe Boxing Federation (ZBF) uthe umqhudelwano lo ubelempumela enhle lapho okuvele utshiki lobhanqa kutshintshwana izibhakela.
“Sibe lemidlalo elitshumi lasitshiya galombili kwabasakhulayo egoqela abancane kanye labakhulileyo, kodwa-ke kasisatholanga imidlalo kwabesifazane okutshengisela ukuthi sisa salele emuva kundlela zokuya kumqhudelwano ephezulu.
“Ngomnyaka ophelileyo sibe lemidlalo eminengi evele kucele labesifazane kodwa silethemba ukuba kumiqhudelwano elandelayo sizakuba labo abesifazane abazakuba yingxenye yalimidlalo,” kulandisa uMasiyambumbi.
UMasiyambumbi uthe abadlali be-boxing abakhethiweyo bazakuya valelwa kungekudala sebelungiselela ukuya kuma-qualifiers.
“Ngenyanga eyedluleyo iZimbabwe iqhube i-Five Nations Boxing Friendly Championship eVictoria Falls lapho abadlali be-boxing besukele eBotswana, Malawi, Zambia kanye leZimbabwe.
“Abadlali be-boxing beBotswana banqoba kulumqhudelwano, benqoba imidlalo eyisitshiyagalombili kungafani leZimbabwe eyanqoba imidlalo eyisikhombisa, iZambia yanqoba imidlalo emine kuzokuthi abadlali be-boxing beMalawi banqotshwa yonke imidlalo,” kuphetha uMasiyambumbi.
