uMthunywa
Ethel Ncube
IQEMBU likaGodolude and Friendly Brother’s band lethule amazwi endunduzo kuqembu leNdolwane ngemva kokwedlula emhlabeni komunye wabo.
Iqembu leNdolwane lilahlekelwe nguPhumulani Ncube owaziwa ngokuthi nguMr Ceremony obhubhele koBulawayo ngoLwesithathu kuyonale iviki.
Intatheli ixhumane lomkhokheli weqembu likaGodolude uMandlenkosi Mpofu owazakala ngokuthi nguGodo obike ukuba kulahleke iqhawe leNdolwane.
“Ngethula amazwi endunduzo kumdeni wakoNcube ngithi duduzekani, iNkosi imbize wasabela. Ukufa akujwayeleki loba nini ngempela silahlekelwe hatshi iNdolwane kuphela kodwa sonke singabaculi silahlekelwa ngokuhanjelwa nguMr Ceremony akekho ongavala isikhala sakhe.” kubika uGodolude
Uqhubekele phambili eduduza iqembu leNdolwane.
“Bafowethu beNdolwane ngithi duduzekani eNkosini ephayo iphinde ithathe. UMr Ceremony siyohlala simkhumbula ngemisebenzi yakhe emihle ade eyenza imisebezi izasala ikhona ayingeke yafa.Lala ngokuthula Mr Ceremony,” kuphetha uMandla.