uMthunywa
Nkosilathi Sibanda
BAPHENDUKE bengelalutho abantwana bezikolo ezikuzabelo zeMatabeleland North, Matabeleland South lakoBulawayo kumincintiswano yokugijima ebiqhutshelwe eChinhoyi kuliviki.
Imincintiswano le ibidibanise izabelo zonke zelizwe, kudingwa abantwana abalethalenta lokugijima abazabumba iqembu lesizwe. Izikolo bezincintisana okwakuqala kusukela ngo-2019 andubana imincintiswano imiswe ngesikhathi kuqhamuke umkhuhlane weCovid-19.
Ukwehluleka kwamaqembu ezikolo kulezi izabelo sekudanise abazali ngoba sekuyinhlalayenza. Akulanguquko ebakhona minyaka yonke.
Ngemva kwamalanga amabili kugijinywa, isabelo seMatabeleland North siqede sikunombolo yesitshiya galolunye, iMatabeleland South yalandela ngokusalela emuva kunombolo yetshumi. Abantwana besikolo zakoBulawayo labo bavoxe udaka nanko baqede bekunombolo yesitshiyagalombili.
IMatabeleland South ithole imendulo ezilitshumi lantathu ezibalisela amagolide amabili, isiliva elilodwa lamathusi alitshumi. IMat North layo ithole imendulo ezilitshumi lantathu kulamagolide amathathu, amasiliva amabili lamathusi alitshumi lasitshiya galombili. Abantwana bakoBulawayo bazame amagolide amathathu, amasiliva amane lamathusi alitshumi.
Abafundi kumidlalo ebiseChinhoyi
Ukuncintisa kwabo kucunule abazali, abaqeqetshi bomdlalo lalabo abahlaziya imincintiswano yebanga leli abathe kuzamele kube locwaningo ngendlela izikolo eziphatha ngayo umdlalo wokugijima.
“Ukulandelana kwezabelo lezi, zingaphansi kwengalane yemendulo kutshengise ukuthi kukhona okungayisikho okwenzakala kwezemidlalo ezikolo,” kubika umcubunguli wokugijima koBulawayo uMartin Tshuma.
Intatheli yephephandaba likazulu idingisise kabanzi ngokwehluleka kwamaqembu la, kwavela ukuthi ababalisi abaqeqetsha abantwana balesandla kukho.
Kubikwa iqembu leMat North kalila impahla yokugijima eneleyo nanko abantwana bancintisa begqoke izikipa zesigaba seTsholotsho. Umbalisi okhulume lentatheli uthe bafika bayangeka ngoba abantwababo babezindlubu eziwele ephokweni.
“Ezinye izabelo zazicwebezela kodwa iMat North yayidanisa. Thina njengezikolo zeMatabeleland siyazehlisa. Iqembu leMat North lalingela i-kit, yayigqoke i-kit yesigaba seTsholotsho. Sayangeka sibili,” kutsho umbalisi lo oyale ukuqanjwa ngoba esesaba ukuxotshwa emsebenzini.
“Angeke sinqobe kumincintiswano le nxa isimo silokhe sinje. Inkinga iqala kubaphathi bezikolo lababalisi. Ababalisi yibo phela abalolonga abantwana kodwa angiboni ukuthi balolonga ngendlela eyiyo. Abaphathi abanengi kukhanya sengathi umdlalo wokugijima abalandaba lawo ngoba kuphuma izimali ezingeneliyo nxa kuyiwa emincintiswaneni.
Omunye umfakazi obehambe kumincintiswano utshele intatheli ukuthi loba kube lokwehluleka kuzabelo ezisemhlubulweni ongezansi yelizwe, bananzelele ukuthi kugcwele ukuqala.
“Okunye okumele sikuveze yikuthi ezinye izikolo ziyaqila. Abantwana besikolo zethu balemizimba emincinyane kodwa ngale eMashonaland uthola ukuthi abalingani. Bakhona abaqilayo begijimisa abantwana abakhulileyo. Ukuqila lokhu kuqalisa kuncwadi zokuzalwa. Lokhu kuzabuyisela muva imizamo yokuvuselela umdlalo wethu. Ilizwe kaliyindawo,” kutsho umfakazi lo.
Kusenjalo, kulumncintiswano kwanqoba iMashonaland West eyathola imendulo ezingamatshumi amathathu lasitshiya galombili.
Isabelo seHarare salandela ngemiklomelo engamatshumi amathathu.
