uMthunywa
Nkosilathi Sibanda
WAFIKA wababonisa ukudla kwamehlo eTanzania, esuka kuqembu leHighlanders esiyadlala ku-Azam FC.
Ulokhe ekwenza lokhu njalo kukhanya uyaphambili ngakho.
Umdlali wenguqu uPrince Dube, loba wadonsa inyanga ezimbalwa engadlali ngenxa yokulimala, wenelisa ukuphenduka enkundleni wafika wayithatha indawo yakhe kalula eqenjini waqhubeka ehlohla kumidlalo yonke.
Ngenyanga kaMfumfu uphenduke emdlalweni ngokuwagaxa entanjeni amabhola, kwakholwa lalabo ababesithi sekuphelile ngaye. UDube owaziwa ngelithi “Mgadafi” kuleli wafika kuqembu le-Azam waphiwa elithi “Beast”.
Lakanye ufike waba yinunu.
Kumdlalo wakhe wakuqala esephendukile, uDube wahlohla amabhola amathathu kumidlalo elandelayo bedibene lezitha ezinkulu iSimba le-Ihefu.
Kumaviki amabili adluleyo, abalandeli be-Azam bagcwale ekhasini leqembu kuTwitter bebika ukuba bayathokoza ngokuphenduka kuka- “Beast”.
UDube useyisithandwa ukwedlula bonke abadlali beqembu le-Azam.
“Sibonga uPrince wethu. Kahlohle mihla yonke sijabule,” kutsho omunye wabalandeli be-Azam kuTwitter, ekhuluma ngolimi lwe-Kiswahili.
Umgadli lo, oselenyanga ezintathu eseTanzania ngaphandle kokuhlohla, uncedise kakhulu ukunikeza abanye abadlali ukuthi balithele emambuleni.
Okwamanje umdlali lo usekhefini njengabanye bonke njengoba kuyisikhathi senkezo yeWorld Cup eqhutshelwa elizweni leQatar.
Ekhuluma ngokuphenduka kwakhe enkundleni, uDube uthe: “Ngifike eqenjini ngemukelwa kuhle, engibona angathi yikho okungivulela inhlanhla yokudlala kuhle.”
UPrince wabizwa enkundleni ze-Azam ngemali engange-$US50 000.
Ithimu le yathembisa ukuthi izancedisa ukuvulela umdlali lo amathuba okuya kwele-Europe lapho okulamaqembu alemali ezwayo.
