uMthunywa
Nkosilodumo Ndebele
KUJAYELEKILE ukuthi impi zabotsheketsha bebanga igolide ziphetha ngokugamulana lokubulalana.
Njengoba ingxenye yokuqala yomkhankaso wesizini siphelile sebethembisane ukuthwalelana amahloka otsheketsha iFC Platinum leNgezi Platinum kungxenye yesibili yesizini ebuyayo.
Lawa maqembu womabili aqede isizini elemiklomelo ephezulu kulamanye wonke. IFC Platinum ibilamaphuzu angu-44 kanti iNgezi Platinum ibile 38.
Umkhokheli weqembu leFC Platinum uNorman Mapeza uthe impumela yengxenye yakuqala yesizini iyamjabulisa kakhulu.
“Ngibona angani sisebenze kuhle kakhulu. Sathatha ikhefu leviki elilodwa kodwa sesizabuyela ukuya lungiselela isizini yesibili labadlali benguqu. Ngiyazi ukuthi sizahlangana lobunzima njengoba siphezulu kulamanye amaqembu kuligi ngemiklomelo esilayo. Siyazi futhi ukuthi kuzaba lempi njalo sizimisele ukulwa,” kutsho uMapeza.
Kuzabe kuyimpi yengqondo njalo ngijabulile ngendlela abadlali bami abadlale ngayo.
UMapeza uthe kuqakathekile ukuthi abadlali belithole leli ikhefu.
“Abadlali baqala ukudlala ekuqaleni komnyaka bengakaze bakuthole ukuphumula. Ngithemba bazaphenduka belamadlabuzane sebesiya kungxenye yesibili yesizini.
“Sesilindele ukuthi sibone ukuthi bakusimo bani nxa bephenduka kulelikhefu ukuze sibone ukuthi siqine okunganani njengeqembu,” kuqhubeka uMapeza.
Kumnyaka odlulileyo, otsheketsha bePlatinum baqeda ingxenye yokuqala yesizini belemiklomelo engu-32 kodwa lonyaka bawuthuthukisile umdlalo wabo ngoba baqede ingxenye yesizini belemiklomelo engu-44.
Benelise ukunqoba amaqembu wonke eligi ngaphandle kweBulawayo Chiefs.
INgezi Platinum layo ithembise ukuphindela emfolweni kusizini ezayo ngemva kokuphuma kwabo emfolweni emdlalweni yabo yokucina yesizini.
“Abafana batshengisa ukwethuka emdlalweni yabo yokucina ngoba sebenqotshwe liqembu lakoNtuthu ziyathunqa iBulawayo Chiefs. Emdlalweni eyalandelayo lokhu kwethuka kwadala ukuthi sinqotshwe ngotsheketsha iFC Platinum kanye leZPC Kariba okwayenza sacina siqeda isizini singaphansi.”
“Kungxenye ezayo sesizimisele ukuthi asisoze sethuswe yimidlalo eyedlulayo ngoba sikhangelele ukuyiphakamisa inkezo yePSL kuleyi isizini,” kutsho umkhokheli weNgezi Platinum uTonderai Ndiraya.
