Bathakazelela ilanga le-chess

22 Jul, 2021 - 00:07 0 Views
Bathakazelela ilanga le-chess

uMthunywa

YiNtatheli kaMthunywa
ABANTWANA abasezikolo ezisemaphandleni bazabizwa njengengcitshi ze-chess kuminyaka ezayo nanko sekusungulwe uhlelo lokufundiswa kwalumdlalo esigabeni seBulilima esabelweni seMatabeleland South.

Lokhu kuze ngesikhathi kunanzwa i-International Chess Day ngoLwesibili. Ilanga leli lithakazelelwa ngoba kwasungulwa inhlanganiso ye-International Chess Federation ngo-1924.

Umdlalo we-chess udume kabanzi emadolobheni obekusenza ukuthi abafundi abangaphandle kwedolobho baswele ithuba lokuthi baphatheke kuwo. Ngokunanzelela ukwanda kwabantwana asebekhwabitha lumdlalo, inhlanganiso ezimbili i-Chess Mates Academy leBulilima District Chess sezibambene ukuze kufundiswe ngokugcweleyo abafundi abaphatheka kulumdlalo.

Ikolitshi leChess Mates Academy elikhokhelwa nguPrisca Sibanda selincedise ekwakheni udumo lwalumdlalo kulindawo.

Ngaphansi kwalesi isivumelwano senhlanganiso zombili, kuzaqhutshwa imncintiswano yabantwana bezikolo ezibalisa iThekwane High, Usher High School, Solusi High, Phakama Secondary, Ntunungwe Secondary, Gwambe High, Tokwana Secondary leThekwane High School.

Intatheli ikhulumisane lomqondisi we-Chess Mates Academy, uSibanda othe ukuqoqwa komdlalo weChess eBulilima, kuyisiqalo sokumemethekisa umdlalo indawo yonke.

“Ngithanda ukutshayela izandla ababalisi abaqeqetsha i-chess esigabeni seBulilima. Loba izikolo zivaliwe, bazimisele ukuthi balandele abadlali bebakhuthaza ngomdlalo. Izikolo ziyinsika ekulolongeni ithalenta ngakho kumele zisekelwe.”

Uthe ikolitshi lakhe leChess Mates lizaphathisa kakhulu ekuvuleni amaqembu adlala lumdlalo.

“IChess Mates Academy izasekela ngalokho elakho ukuze umdlalo ukhwabithwe ngabanengi ezikolo. Sifuna ukuletha inguquko kubadlali ngokubanikeza ithuba lokuzibonakalisa. Mhlawumbe singathola abadlali abazamela isizwe bephuma kulindawo,” kutsho uSibanda.

USibanda uqhubeke wathi kubalulekile ukuthi izikolo zeBulilima zikhuthaze amankazana ukuthi adlale iChess.

“Kubalulekile ukuba sonke sikhwabithe umdlalo lo. Kudingeka ukuthi labantwana abangamankazana bazithuthukise kulumdlalo ngoba uvula amadlelo aluhlaza empilweni,” kutsho uSibanda.

Umgcinisihlalo weNational Association of Secondary Heads (Nash) eBulilima, uVusumuzi Ncube utshele uMthunywa ngoLwesibili ukuba bazasukumela phezulu basebenzelane leChess Mates Academy.

“Isigaba seBulilima sizasebenza lenhlanganiso yeChess Mate Academy ukwenzela ukuthi sithuthukise umdlalo weChess. Sikhangelele ukuthi abantwabethu bafunde okunengi.”

Share This:

Sponsored Links