uMthunywa
Charles Dube
KHUMBULA mfundi ukuthi kuviki edlulileyo sitshiye unakaHlalaphi, uLontethe, umnawakhe kanakaSenzile ehambe wayatheza inkuni yena unakaSenzile esele ngekhaya. Lelo kwakuliqhinga lokuthi uLontethe abonise uSenzile indlela yomuzi lapho angendela khona ukuze umoya kanina uhlaliseke. Wayeqhubekele phambili uLontethe watshela uSenzile ukuthi lapho abazali bakhe labo batshona khona.
Kwamethusa uSenzile lkhu okwakukhulunywa ngunina omncane. Wezwa njalo uSenzile ukuthi umzali womuntu angaze atshona lomuntu angamthandiyo. Nxa umzali womuntu engathandi ukuthi umntanakhe endele emuntwini azwana laye, uyamkhuza umntanakhe. Esenqume kakhulu ngenkulumo yakhe uLontethe wabona ukuthi kungcono ukuthi zifohlele ngaphakathi kwensimu inkomo. Wabona ukuthi ahle aveze sobala lapha ababefuna uSenzile ayekwendela khona.
UnakaHlalaphi wabuza uSenzile ukuthi uyababona lapho abajayele khona na? Wavuma ngaphakathi uSenzile kodwa wathi unina kayibhoboze imbongolwana njengoba kunguye owayeyiqalile. Waqhubeka uLontethe ethi yibo abantu abangokhelana labo umlilo labo. Yibo abantu ababelezindlu ezivuthiweyo. Yibona abantu ababengafuya umntanomuntu unina alale ubuthongo elethemba. Wavuleka amaehlo uSenzile. Wakhuluma emoyeni. “Kanti uZindaba angaxelwa iqhele ngunina.
“Pho njengoba laye ubesithi umama ngunina-ke?” Wayesezwile ukuthi uqondiswa ngaphi uSenzile. Wayeqondiswa kuZindaba yena owayemthatha njengomnewabo kanti laye wayehlonipha kakhulu unakaSenzile. ULontethe, unakaHlalaphi wafika walandisela udadewabo unakaSenzile ababekukhulumile loSenzile khonale enkunini.
Wayekulindele lokho unakaSenzile ngoba waze wabuza kumnawakhe uLontethe ukuthi uSenzile kabanga lobuqholo yini?
ULontethe wamtshela unakaSenzile ukuthi wayemtshengisile bona lapho ababekhangele khona. Wabuza yena unakaSenzile ukuthi wayengethukanga yini uSenzile? Kwethuka yena unakaSenzile, sekuze kungathi uyazisola ukuthi babekwenzeleni khonokho njengoba uSenzile wayesezahlala ethukile nje. Kwakhanya ukuthi unakaSenzile wayefuqwe ngumhawu womkhwenyana; lokwesaba ukuthi nxa bengaminyezelanga kumbe umntwana wayezasuka alandele oSilobile, bona abalandela oNgenzile.
Watshaywa luvalo unakaSenzile lapho enakana ukuthi uSenzile angala ukwenza lokho abakudingayo yayizazala nkomo bani? Kuyini okwakuzakwenzakala? Ekulaleni kwabo kuthiwa wabaguqela abaphansi unakaSenzile.
Wabancenga bona abaphansi ukuthi bamthobele umntwana, enyanye ukuya eMbijana, yona eyayisixhwalise abantwana. Wafisa ukuba bamthobele abaphansi emesabe uNgenzile, abesabe abamzalayo, bona abamfisela okuhle – ukuthi abe lomuzi. Bamjuma ubuthongo elokhu ethethela unakaSenzile.
Ngakwelinye icele uSenzile laye bamjuma elokhu ekhamekile, engazi ukuthi unakaZindaba wayezamkhangela ethini mhla ezahlangana laye. Umnawakhe kaZindaba oyinkazana wayezakumkhangela njani mhla behlanganayo?
Amaphaphu ache ayesabhulana nje engakezwa enhliziyweni yakhe ukuthi uyamthanda uzindaba. Wayekade esithi kumbe ngumnewabo, angamfela, engakezwa ukuthi angamfela njenglikhwa elizakuba ngumkakhe, limfuye, londle labantwabakhe.
Umbuzo abalawo yikuthi kambe kayikuzikhohlisa nje abuye azisole phambili?
