uMthunywa
Nkosilathi Sibanda
KUYAVELA ukuthi umdlalo wethenisi uyakhula koBulawayo nanko kulabadlali bakulelidolobho abazamela ilizwe kumqhudelwano omkhulu owe-Africa Junior Championships lonyaka.
Abadlali laba, bancintisa kubanga lama-Under-14, njalo yibo abanqobe kumqhudelwano we-International Tennis Federation (ITF) kunye leConfederation of African Tennis (CAT) Southern African Junior Individual and Teams Championships eNamibia kuliviki.
Kuqembu ebelimele ilizwe eNamibia, abakoBulawayo abazamela ilizwe ngamankazana, u-Akeelah Khanye loKuzivaishe Chapepa.
UChapepa wenze kuhle nanko uqede eyintshantshu yezwekazi elisezansi ye-Africa njalo usebalwa njengomdlali ophezulu ukwedlula bonke i-Africa yonke. Wanqoba uJordan Edwards oweSouth Africa 6-2, 6-1 kumdlalo wokucina.
Umdlali lo uthole imendulo yegolide eNambia. Uphinde wahlangana loKhanye lomunye umdlali wakuleli uRutendo Tom benelisa ukunqoba iqembu leSouth Africa 2-0.
Iqula labadlali beZimbabwe beliqeqetshwa ngu-Athnie Chifamba loTerence Mazungaire.
UChifamba, ekhuluma lentatheli yeZimpapers Sports Hub uthe uyajabula ngempumela yabadlali bakhe.
“Iqembu lidlale kuhle sibili. Bancintisane lentshantshu ezivela emazweni alodumo lokudlala ithenisi kumhlubulo ongezansi ye-Africa. Amankazana akuhlandla lama-Under-14 anqoba iSouth Africa kabili emdlalweni.
“Sekulesikhathi eside amankazana la angaphansi kweminyaka engu-14 yokuzalwa esehluleka ukufinyelela kubanga laphezulu. Ukunqoba kwabo kutsho ukuba iZimbabwe izakuba labadlali abancintisa kuma-African Junior Championships. Kube yimpumelelo enkulu kakhulu. Njengomqeqetshi ngiyaziqhenya ngabo,” kutsho uChifamba.
Uthe abafana bakubanga lama-Under-14 baqede umncintiswano benze kuhle. Kubadlali laba bekuloMuchengeti Manzungu, Divine Kaliofas loCourage Ndhlovu.
“Abafana babeqinile. Amantombazana aleminyaka yokuzalwa engaphansi kwe-16 adlale kahle kakhulu. Besimelwe nguCharnell Zhuwakini, Zahara El Zein loTinotenda Chipfakacha. Kuqula labafana besidlalelwa nguMorgan Mukwanila, Tawananyasha Shamuyarira loMwaita Mukudu,” kubika lumqeqeqtshi.
