uMthunywa
Innocent Kurira
ABADLALI beqembu lenguqu yabesifazane eleHighlanders Royals lithole isipho seKhisimusi masinyane nanko libe yintshantshu yeZifa Southern Region Women’s League.
IHighlanders Royals iphiwe inkezo kunye lezicoco emcimbini oqhutshelwe emahofisini aleliqembu.
Ukunqoba kubonakale kuyinkuthazo kubadlali ngoba inengi liqede isizini likhathele, nanko bebephethe bedinga usekelo lwemali lokunye.
Ngokunqoba abakwenzileyo, iHighlanders Royals izadlala kuligi ephakemeyo eyeSuper League ngomnyaka ozayo.
Ukaputeni weqembu uSakhile Masuku uthe balangazelele ukuphatheka kumidlalo yeSuper League lapho abazafuna ukuthi babuthe zonke izicoco ezikhona.
“Siyajabula njengeHighlanders Royals ngokunqoba iligi. Sijabule kakhulu ngokungena kuSuper League. Bekuyisizini emnandi, enzima kodwa siyajabula ngokunqoba,” kutsho uMasuku.
Umgcinisihlalo weRoyals uSamulekiso Silengane ubonge iziphathamandla zeHighlanders ngokusekela iqembu labo labesifazane.
“Isizini yethu iqhubeke kuhle. Senelise ukuvuselela iqembu lethu leHighlanders Royals. Siyajabula ukuzithola sizintshantshu. Uhambo belungelula kodwa sikwazile ukuthi sehlule inkinga ebesilazo. Siyajabula ukuthi sesingene ku-Super League,” kutsho uSilengane osetshayelwe ihlombe ngomsebenzi wakhe wokuvuselela iqembu.
USilengane ubonge umgcinisihlalo weHighlanders uJohnfat Sibanda lequla lenkokheli kuleliqembu.
“Sithanda ukubonga iziphathamandla zeqembu leHighlanders ezikhokhelwa nguJohnfat Sibanda ngosekelo abaluphe abadlali abangamankazana, osekuleminyaka eminengi kungenzakali.
“Besingeke sikwenelise lokhu kungela sekelo lwabo. Abaqhubekele phambili kwelizayo.”
Umgcinisihlalo weZifa Southern Region Women’s Football uTakundwa Chimundiya ubuye wabika ngendlela iligi eqhube ngayo kulisizini.
“Isizini ihambe kahle. Besilamaqembu alitshumi. Bekulenkinga ezibekhona kodwa senelise ukudlula kukho. Inkinga enkulu kube ngamanye amaqembu eyehluleka ukufeza imidlalo.
“Esikucelayo ngomnyaka ozayo yikuthi amaqembu adonse amankampani. Sifuna ukusondeza imali kumidlalo yethu. Lokho sizakwenza ngokuba lenhlelo zokunxusa abantu abanengi kumidlalo yethu.”
