uMthunywa
YiNtatheli kaMthunywa
ABAGIJIMI abaziwayo kuleli bangena umango kulimpelaviki besiyagijimela ukuqeda umjaho omkhulu oweEconet Victoria Falls Marathon.
NgeSonto, phose abagijimayo abafika i-2 000 bazabangisana ngesiqubu ukuyatshaya intambo kumjaho lo ongamakhilomitha angu-42,2km.
Ezigijima zingapheli umoya kuleli uNkosiyazi Sibanda, Kevin Pangiso, uSamukeliso Moyo, uWirimai Juwao loOlivia Chitate zizabangisana ukuphutsha lumango. Abagijimi laba kuzamele babophe iziqini ngenxa yokuthi bakhangelane lokuncintisana labavela eKenya, South Africa, Canada, Spain, Sweden, USA, New Zealand, Japan lase-Ethiopia.
Umvuzo ophezulu ubiza i$900. Umgijimi olandelayo uzathola i$750 kuthi owesithathu uzaphiwa i$600. Kumjaho we-21,2km, kuzwakale ukuba ozanqoba uzathola i$500, owesibili i$350 kuthi lo ozaqeda engowesithathu uzathola i$300.
Abaqoqi bawo babika ukuba basemaphathelweni okwamukela labo abalesifiso sokugijima.
Umjaho lo ubalelwa phakathi kwaleyo engaphansi kweAssociation of International Marathon and Distant Races — inhlanganiso eqhuba imincintiswano yokugijima umhlaba wonke.
Kumbiko othunyelwe iphephandaba likazulu, kubikwa njengeminyaka yonke, abagijimi bazasukela eLala Lodge besiyaqeda umjaho esikolo seVictoria Falls Primary.
“Umjaho walonyaka uzaqhutshwa mhlaka 3 Ntulikazi. Umango omkhulu owe42,2km, lowe-21,2 kanye le7,5km zilandela ndlela nye. Kuzagijinywa kusukela egedini leLala Lodge, kudlulwe ebholohweni leFolosi njalo.
“Abagijimi bazathi ukusondelela kumgcele weZimbabwe leZambia bazibonele mathupha ubuhle bemvelo kulindawo andubana bayecina ukugijima esikolo seVictoria Falls Primary.”
Omunye wabagijimi bodumo kuleli uNkosiyazi Sibanda ubike ukuba uselungiselele ukuthi ayezama ukuphutsha umjaho lo ephambili.
USibanda nguye oseke waba yintshantshu yalumjaho ngokuqeda ukugijima umango wamakhilomitha angu-42 ngemva kwamahola amabili nje (2.19.11 sec). Lonyaka ubhekane lokwenza okufanayo.
“Ngilungiselele ngaphelela. Imijaho enjengale iqakathekile kithi abagijimi. Ngilethemba lokuthi ngizaqhuba kuhle, ngenelise ukuthi nginqobe abanye,” nguSibanda lo.
Indoda eyesatshwa ngesiqubu sayo kuyo yonke imjaho uKevin Pangiso uthe: “Ngiyeza eFolosi ngilande ukuzo kwenza ngcono. Imali yomvuzo wokuqala ngiyafuna,” kutsho uPangiso eqeda kugijima kumjaho weTanganda half marathon ngeSonto edluleyo.
Umjaho weEconet Victoria Falls Marathon wasungulwa yinkampani le ibambene lenhlanganiso yeNational Athletics Association of Zimbabwe.
