Azitshe Rush! . . . Ugaba ngowakho umsebenzi

01 Aug, 2019 - 00:08 0 Views
Azitshe Rush! . . . Ugaba ngowakho umsebenzi Rahman Gumbo

uMthunywa

NXA iqembu lesizwe amaWarriors enganqoba iMauritius ngeSonto, akula isizatho sokuthi iZifa idinge omunye umqeqetshi.

Umqeqetshi osakhona uRahman Gumbo uzaphindela enkundleni labadlali bakhe bedibana lesizwe lesi okwesibili kumqhudelwano weChan, kulandela ukunqoba 4-0 kweZimbabwe ngempelaviki.

Ihlandla lesibili lomdlalo lo lizaqhutshwa enkundleni yeBarbourfields. Iqembu elinqoba kukhangelelwe ukuthi lihlangane leBafana Bafana kumbe iLesotho, ngemva kwalokhu kuhanjwe kumidlalo yokucina yalinkezo ezaqhutshelwa kwele-Cameroon.

Kukhangelelwe kabanzi ukuba iZimbabwe yedlulele phambili kuphela umdlalo wayo le-Mauritius.

Umdlalo lo uqhutshwa nngesikhathi inhlanganiso ebambe inguqu kuleli izitshayisa ngekhanda isithi idinga umqeqetshi. UGumbo ucelwe ukuthi abambe lumsebenzi kulandela ukutshiya kukaSunday Chidzambwa ngeviki eledluleyo.

IZifa ifuqa umbono wokuthi kudingeka umqeqetshi waphetsheya, ikakhulu uCharles Mhlauri owake wabamba intambo ekuWarriors.
Kuyaziwa ukuthi iZifa ayilalutho esambeni kodwa iphikelela ngokudinga umqeqetshi waphetsheya. Ngaphandle kukaMhlauri, abanye abaqeqetshi kubikwa sebedingwa kwele-Germany njalo.

Umqhudelwano we-Chan udlalelwa ngabadlali abatshibilika besemazweni abo kuphela.

Inkezo le yancintiswa okwakuqala ngomnyaka ka-2009 kwele-Cote d’ Ivoire lapho okwanqoba khona iDemocratic Republic of Congo.

Ngomnyaka odluleyo kunqobe iMorocco isidla iNigeria 4-0.

Abadlali abakhethwe nguGumbo yibo okumele batshengise ukuthi lumqeqetshi ulungele ukuthi aqhubekele phambili na.

Bayazethemba labadlali bamaWarriors abakhulume lephephandaba likazulu besendleleni yokuza eBarbourfields lamuhla.

Omunye wabadlali ozathenjwa ukuthi agcine umqeqetshi ekhona uNqobizitha Masuku ubike ukuthi bazafika kuma-final omqhudelwano weChan.

“Lo ngumdlalo okumele siwunqobe ukuze siyefika kuChan. Sizadlala sisazi ukuthi siphethe amaphupho esizwe,” kutsho uMasuku.

IZifa ibika ukuba itikiti elitshiphileyo lokubukela umdlalo lizabiza i$20.

Kusenjalo kubezindaba ezimnandi ukuzwa ukuba iZimbabwe isizancintisa kumqhudelwano wenkezo yomhlaba ngomnyaka ka-2022.

Kumidlalo le ezaqhutshelwa e-Qatar, amaWarriors ahlelwe ukuthi adlale leSomalia.

Share This:

Sponsored Links