uMthunywa
Mthokozisi Dube
UMQEQETSHI weHighlanders uElroy Akbay ubike ukuthi akula basekeli balithimu abakhusela iqembu okumjabulisayo njengalabo abakhuza ithimu nxa idlala kwezinye inkundla phandle kwakoBulawayo.
U-Akbay uthe lokhe eqalise umsebenzi, usenanzelele ukuthi ukuhlabelela kwabasekeli yikho okwenza iBosso idlale kuhle, inqobe nxa ikwezinye inkundla.
Umqeqetshi lo ucele ukuba abalandeli ababukela beseMagumeni balingisele ngokufanayo ukwenzela ukuthi umdlalo ukhwabithe.
Ubike ukuba uyasuthiseka ngabafana bakhe njalo uthanda ukubatshayela ihlombe noma nje esafuna ukuthi imidlalo yeTshilamoya ibe yileyana eyokuthi kunzima ukuba inqotshwe.
“Sisafuna ukudlala imidlalo ezenza ukuba amaqembu esidlala lawo esabe ukuza eMagumeni kungakho sidinga usekelo lwabalandeli ukuthi batshaye imvokloklo nxa abafana besenza kuhle.
IBosso isesigabeni sesithathu kungalane yePSL ngemiklomelo elingana leyeFC Platinum kodwa ilomdlalo engakawudlali leqembu leBorder Strikers lona elilokhe lilemiklomelo emithathu ngemva kokuthola iHwange ibanjwe ngumqando.
Iqembu likaMantengwane akukho lapho elivuza khona ngoba imvimbi zivala okokuthi lamanzi angeke avuze njalo enzikini uSimon Munawa uyalitshintsha okwamagama nanko phela nguye njalo ovulele iBosso amasango uBruce Kangwa engakengezi.
UKangwa kulezi insuku uhlanyisa abalandeli kulandela ukuthi ungene kulo umdlalo evela eNamibia lamaWarriors kunkezo yeCosafa walithela emambuleni. UPrince Dube kanye loKing Nadolo benza kube lenkwelo kanye levokloklo nxa bengalibamba ngoba besenza kahle abafana kukanti uNjabulo Nyoni obengunozinti ubelwela ukutshengisa uAkbay lebhentshi lakhe ukuba laye uyenelisa ukumisa imboko engavela noma kuwuphi umgadli kuPSL.
Isicelo sikaErol lesi sisekelwe nguCosmas ‘‘Tsano’’ Zulu umqondisi wabaqeqetshi.
Imidlalo ekhona kulimpelaviki:
NgeSonto: Caps United v Bulawayo City (National Sports Stadium), Highlanders v ZPC Kariba (Barbourfields), Hwange v Mutare City (Colliery).
NgoLwesithathu 29 kuNhlangula: Hwange v Chicken Inn (Colliery).
