uMthunywa
Silo C Dube kugwalo
SIZWILE kuviki ephelileyo uMaNdlovu umkaSwabide Khumalo ebhubhudla esidla amalahle ethethisa isiqhatshwa salapha ekhaya uVikinduku ngokuhlanganyela labanye abafana ekwaluseni bemthethisa ngobulima bakhe. Wakhuluma amagama amabi kakhulu uMaNdlovu, esingathi ayefanele ngoba wezwa ubuhlungu obukhulu ngokuthethiswa kwengane yakhe.
Samuzwa kwenye indawo esithi:
“Nxa usafuna ukuqhubeka uhlala kulo umuzi, yazi lamuhla ukuthi uNkosi likhiwa lakho. Umhloniphe.
Okokuthi ngikhathazelwe umntwana yinto engiyifuyileyo, ngitsho. Khohlwa uphinde. Ohlukuluza uNkosi, uhlukuluza mina, wena nja!” Yinhlamba embi kakhulu le eyokubiza umuntu uthi yinja. Njengoba ngitshilo ngaphambilini wehluleka ukuzibamba kunkulumo ezinje ngenxa yokuthukuthela lenzondo uMaNdlovu.
Kusenzakala lokhu uKhumalo wayevukele edolobheni kodwa njengomuntu owazi kuhle umuzi wakhe lempilo zabantu balapha ekhaya, wahle wayifunda ivaliwe ukuthi indaba zazizimbi ngekhaya ngoba uVikinduku owamhlangabeza ngesikotshikala wayengasuVikinduku wansuku zonke. UKhumalo nxa embuza ukuthi kezwa kuhle uVikinduku, uphendula ethi kaguli. Nxa uKhumalo embuza ukuthi wasinama kutheni, uVikinduku yena uthi akulalutho, utshaywa likhanda kancane.
UKhumalo eyilandisa leyondaba kuthiwa wazithulela esizwa uVikinduku ewahutshuza amanga aluhlaza.
Wabona ukuthi kwakukhona umfana owayengafuni ukumtshela khona. Wazithulela wathi loze lidubuke lodwa ithumba. Langekhaya uthi wathola wonke umuntu ehlobile. Wadinga waswela uKhumalo ukuthi ngabe sasivelele ngaphi kwelizwe leso savunguzane esasibaphandle ngothuli baphenduka izithutha bonke.
Njengomninimuzi uKhumalo kamelelanga ukuthi kuze kuhlwe babe bobabili loMaNdlovu anduba abuze ukuthi kungabe kwenzenjani lapho ekhaya. UMaNdlovu wazama ukufihla ethi akulalutho olukhona, konke nje kwakulungile. Wavuka ngolaka uKhumalo etshela uMaNdlovu ukuthi kasumntwana yena njalo ethi uhle wabona ngoVikinduku embumbela umlomo ukuthi kukhona okukhona. Wacina ebhoboka uMaNdlovu etshela uKhumalo ukuthi wayephoxwe nguVikintonga wakhe uKhumalo.
Wayeliguqule ibizo likaVikinduku uMaNdlovu ngenxa yokuzonda okwenza uKhumalo wabuza ukuthi ngubani uVikintonga, yena esizwa kuhle ukuthi utsho bani uMaNdlovu? Wayesizwa ubuhlungu uMaNdlovu ngoba waphendula imibuzo kaKhumalo ebambe iqolo ehlengezela inyembezi. Kwamangalisa umdala uKhumalo lokhu wadinga waswela ukuthi ngabe wenzeni-ke Vikindukundini? Kwabanzima ukuthi akuzwisise lokho uKhumalo ngoba kukhanya ukuthi wayemthemba uVikinduku ethi engazake akwenze ukungahloniphi uVikinduku.
Wayengakukholwa lokho okwakwenziwe nguVikinduku ethi kade bahlala laye uVikinduku engumntwana ohloniphayo. UMaNdlovu utshela uKhumalo ukuthi isiqhatshwa sakhe lesi siyimpisi ezembathise esemvu.
Lokhu kutsho ukuthi uVikinduku lowo wayezenza olungileyo yena engalunganga. Uphendulana loKhumalo ekhala ngoba sitshelwa ukuthi zaziseqa umbombo inyembezi. UKhumalo uvikela uVikinduku ebuza ukuthi uMaNdlovu wayekuzwe ngaphi lokho ngoba uVikinduku wayebathanda bonke abantwana ebathatha njengabanawakhe.
Waqhubeka ethi kakholwa into enjalo uKhumalo. Wayilandisa indaba uMaNdlovu ethi uNkosi wayefike ekhala bevela nathisa inkomo ethi ubehlekwa yibo oVikinduku labangane bakhe bethi ngokuyisilinyana okungelancedo, okulekhanda eliyisizemazema eligcwele amanzi endaweni yobuchopho. UKhumalo yena uthatha icele likaVikinduku lapho uMaNdlovu emtshela ukuthi uVikinduku ulandule embuza kodwa kuzikhanyela ukuthi ucatsha ngomunwe.
Uyala uKhumalo nxa uMaNdlovu emtshela ukuthi abize bobabili abantwana nxa efuna ukuzwa iqiniso ethi akuladale lenduna. Uveza umqondo wokukhangela izinto nxa zonke lapho etshela uMaNdlovu ukuthi abantwana ngabakhe bonke. Nxa besona kabakhuze bonke.
