uMthunywa
Silo C Dube kugwalo
KUVIKI ephelileyo sizwile ugogo uMaKhuphe exoxa loMaNdlovu abambelethisa umntwana oyisigoga esevuma ukuthi isenzo sabo sokufisa ukuthi leyongane idluliswe kwakungenxa yamasiko omdabu. Usevuma uMaKhuphe ukuthi amasiko anjengaleli sekumele aguquke. Yinto enhle le eyenziwa nguMaKhuphe ngoba wayesezisola njalo esevuma ububi bamasiko akudala athile.
UMaNdlovu laye ekuxoleleni lezi zalukazi uMaKhuphe loMaNsingo ufundisa abantu izifundo ezithile.
Esezwile ukuthi uMaNsingo sewabhubha, uMaKhuphe esithi aluba usaphila ubezavumelana laye ukuthi bayaxolisa ngesenzo abaphosa basenza kuNkosi. UMaNdlovu uthi ofileyo kabanjelwa lizwi. Lokhu kutsho uuthi lanxa ubemubi engalunganga okunganani osefile kabanjelwa sikhwili.
Ngumuntu oxolelayo uMaNdlovu ngoba utshela uMaKhuphe ukuthi laye angakhathazeki ngalokho abaphosa bakwenza ngoba ukuphosisa kungokomuntu wonke. Lesi yisifundo ebantwini ukuthi bafunde ukuxolela ababoneleyo ngoba ukuphosisa kungokomuntu wonke, laye owonelweyo angavuka engophosisileyo kusasa.
UMaNdlovu esetshele uKhumalo ukuthi esinye sezalukazi ayexabana lazo uMaNsingo sewabhubha uKhumalo wahamba ezitshaya isifuba ngenyanga yakhe yeZhombe uBharimasoso.
Sinanzelele bafundi ukuthi uKhumalo lanxa esebuyele esontweni ezenza okhonzayo kodwa umoya wakhe awusukanga ekukholweni ezinyangeni ngoba sizambona uKhumalo esebuyele kunyanga yakhe uBharimasoso ethi uyambonga ngezinto ezinhle ezenzakala kuye. Kaboni kuyizibuziso ezivela kuNkulunkulu lokho okwenzakala kuye kodwa uthatha amaqubaquba emali ayewathi qithi kunyanga uBharimasoso.
Uyakhula uNkosi njalo sekuyisibanga sokuthi angayangena esikolo, kwasekumele adingelwe indawo esikolo esifanele abantwana abalengqondo ezithathela muva izinto. Uyayinqinekela imfundo yomntanakhe uKhumalo. Njengokuxwayiswa kwakhe ngabanye ukuthi zikhona izikolo zeZIMCARE ezithatha abantwana abanjalo wahle wathatha ilivi yethemu yonke yokucina umnyaka esiyalungiselela ukuyafunda kukaNkosi ngomnyaka ozayo.
Uyagijima uKhumalo ayefika kumlamu wakhe uNothando ukuthi amncedise badinge indawo ezikolo ezinjengabo Sir Humprey Gibbs. Bafika khona bemukelwa ngumphathi walowo muzi okwakuthiwa nguDewa.
Sebemlandisele ngesimo somntwana uDewa wabaxwayisa ngokuthi bayebona abohlangothi lweSPS. UDewa waluchaza njengogatsha olusemahofisini ezemfundo.
Waqhubeka ethi kulugatsha kusebenza izingcwethi ezibona ngokungasebenzi kuhle kwengqondo yomntwana zibe sezisitsho-ke ukuthi kumele abonwe ngudokotela owelapha abagula umkhuhlane wengqondo, atsho ukuba umntwana ulengqondo ezingaphelelanga kahle lokuthi angathola usizo ezikolo zaloluhlobo.
Babengakazitholi lezo zincwadi oKhumalo njalo wathi ecela uDewa ukuthi amzwele uDewa wakwala lokhu.
Wathi akwenzeki lokho uDewa wayaphambili ethi leyo yiyo kuphela indlela yokuthi umntwana bamamukele lapho.
Wathi kumele babeleqiniso ukuthi umntwana abamukelayo ugogekile engqondweni. UKhumalo uthi waphendula esithi owakhe uyamazi ukuthi unjalo ebuza ukuthi pho ubufakazi obabusadingeka babungobani.
UDewa yena wama ngelomthetho etshela uKhumalo ukuthi kwakungasuye otsho njalo kodwa umthetho.
Waze wakhumbuza uKhumalo ukuthi laye njengomphathisikolo wayekwazi ukuthi umthetho kumele ulandelwe ungaze ube yilowaya abawubona ungelangqondo.
Wanqotshwa yilowo mbuzo kaDewa uKhumalo wahle watshintsha wabuza ukuthi kambe yona indawo yayikhona na? UDewa yindoda emela iqiniso njalo elandela umthetho engahambelani lokona osekwande ebantwini (corruption).
