uMthunywa
C Dube
KULIVIKI sizake sixoxe ngabalingiswa abamqoka kulolugwalo. Lapha sitsho laba abanjengaboSwabide Khumalo, uyise kaNkosi, uMaNdlovu, unina kaNkosiphile (uNkosi), uNkosi kunye labanye. Lapha ngikhethe ngokuqala ngoMaNdlovu, unina kaNkosi.
UMaNdlovu ngumama ozinikelayo kulokho akwenzayo lokumvelelayo. Likholwa eliqinileyo, elingatshedeli emuva ngokholo lwalo.
Ulesibindi uMaNdlovu ngokwenelisa ukuzibuza izalukazi ezazize mbelethisa ukuthi zazisithini ngomntanakhe.
Sesikuzwe kanengi ukuthi izalukazi lezi uMaKhuphe loMaNsingo babeceba ukuthi usane lukaMaNdlovu ludluliswe ngokuklinywa ngoba lwaluyisilima esesabekayo.
Wazibuza ngala amazwi uMaNdlovu: “Lithini ngomntanami, lina bomama? Lithini enziweni? Liyadlala. Zwanini, elikulande lapha yikungibelethisa. Lingalingi lakancane ukuzenza omantshi bamanga ngalokho okumele kwenziwe ngomntwana. Ngowenu? Waqhubeka uMaNdlovu etshengisa ukholo lwakhe kuMlimu ethi:
“UMlimu nguye yedwa zwi osaziyo isizatho esimenze wangipha umntwana onje. Ngiyasamukela isipho sami lesi esivela kuye uThixo. Ngakho-ke lina nxa limbulala umntanami, kungakhathalekile ingabe likwenza lokho livumelana loKhumalo, mina ngi- ngi- ngi- ngiqonda eRoma emapholiseni khathesi so.” Kusobala ukuthi konke akwenzayo ukubeka kuMlimu wakhe.
Uzimisele ukuthi akukhathalekile ukuthi izalukazi lezi zenza leli cebo zihambelana lomyeni wakhe uKhumalo.
UMlimu wakhe umfaka phambi kwazo zonke izinto.
Lanxa ingane yakhe kuthiwa yisilima esesabekayo, uMaNdlovu uthi yena uyayithanda kuphela injalo njalo ulethemba ukuthi lomkakhe uKhumalo uzayemukela enjalo.
Uzimisele ukuyimela ingane yakhe uMaNdlovu ngoba utshela izalukazi lezi ukuthi akula osawadla amabele ongamehlukanisa lengane yakhe. Uphetha ngokuthi lokho kungenzeka yena esefile kuphela.
Lokhu yikuzinikela okukhulu lapho umuntu aze azinikele ngokufa kwakhe into eyenziwa yindodana kaNkulunkulu, uJesu kuphela.
Uyayiqakathekisa imfundo ngoba uyala nxa abantwabakhe, uDubani loS’kho besithi kabayi esikolo ngoba uyise uKhumalo wayethe uzakalove esikolo.
UKhumalo yena wayesesithi kungaya ngasifudlana nxa okungabantwanyana kwakhe kungayanga esikolo esesabela ukuthi akulazifuba kungahamba kufafaza amanga kusithi unina ubelethile, abantu bamenze usomangase.
UKhumalo lanxa singaka hlolisisi isimilo sakhe, kodwa siyabona ukuthi ligwala lendoda njalo ulamanga esabekayo.
Lokho athi abantwana bazahamba befafaza amanga liqiniso kodwa yena ukuphendula ethi ngamanga.
UMaNdlovu usifundisa okuthile ngokwazana phakathi kwendoda lomkayo.
Uthi wayesithi uyamazi kuhle umyeni wakhe uKhumalo kanti wayehamba eceleni. Lokho uMaNdlovu wakwazi esetshona laye ngekhaya lapho esezinike ikhefana emsebenzini.
Uyasitshela uMaNdlovu ukuthi ukuze umazi umuntu wakho kumele umazi ejabula, umazi lanxa ehlukuluzekile emoyeni.
Uthi wayesazi uKhumalo engumahleka njalo kodwa okwamanje wambona esetshintshile.
Sitshilo ngaphambili ukuthi ulesibindi uMaNdlovu ngoba uthi ngelinye ilanga waqunga isibindi wamqonda ethe kho esitulweni ehlezi emthunzini wambuza ukuthi wahlala yedwa kwakutheni engezomxoxisa amchithe isizungu?
Sizaqhubeka sixoxa ngabo abalingiswa kunsuku ezizayo.
