uMthunywa
Nkosilathi Sibanda
IQEMBU leZRP Bulawayo elitshibilika kunguqu yeligi ka-Division One kumhlubulo ongezansi yelizwe selitshengise ukuthi liyenelisa ukuzenzela umathanda nanko phela kwezinye izikhathi liyekela ukudlala.
Ithimu le ikhokhelwa ngamapholisa kodwa kuyamangalisa ukuthi kungani litshaphaza umdlalo omuhle ngokudelela.
I-ZRP Bulawayo ikhethe ukuthi iyedlala umdlalo wokukhudumeza inkundla zamathimu ePremier Soccer League kumdlalo weBulawayo Chiefs leNgezi Platinum, endaweni yokuba iyedlala leMosi Rovers. Lokhu kwadala ukuba umdlalo udluliselwe phambili.
Izikhulu zeZifa kulumhlubulo zithi zicunuke kakhulu ngesenzo seZRP Bulawayo njalo iqembu leli alizange licele imvumo kuzikhulu zeZifa.
Ukudelela kwaleliqembu kuzondise inkokheli zeZifa kulumhlubulo ezibike ukuba nxa ithimu le ingaphinda isenzo sayo, ingahle ivalelise kunguqu.
Ekhuluma loMthunywa ngokudelela kwamapholisa lokhu uMgcinisihlalo weZifa kulumhlubulo welizwe uMusa Mandaza uthe okwenziwa yiZRP Bulawayo lihlazo.
“Kubizwa kuthiweni okwenziwe yiZRP Bulawayo Province kodwa. Iqembu leli alizange lisibikele ngomdlalo walo wokukhudumezela inkundla amaqembu ePSL iBulawayo Chiefs leNgezi Platinum. Bancitshwa inkundla yeLuveve ngenxa yalokhu.
“Sicela amaqembu ethu ukuthi alandele imithetho ehleliweyo, abike kulesikhathi ukuba azafuna ukuphatheka kumidlalo ethile. Okwenziwe yiZRP Bulawayo kuyadanisa,” kutsho uMandaza.
Ukudelela kweqembu lamapholisa leli kumdlalo kaDivision One akuqalisi ngalo. Ngesizini edluleyo iNtabazinduna yaba liqembu elagcwala emilonyeni yabantu ngenxa yokudelela onompembe lokukhahlameza abadlali bamanye amathimu.
Kusenjalo, uMandaza uthe balinde ukuzwa njalo ukuthi iqembu leCasymn lehlulwa yini ukudlala kumaviki amabili adluleyo.
Kubikwa ibisilandela umzila weZRP Bulawayo wokungafuni ukudlala. ICasymn yehluleka ukutheleka mhla kumele idibane leNdlovu Iyanyathela enkundleni yamasotsha eMzilikazi Barracks.
